పవర్ స్టార్ పవన్ కళ్యాణ్ తనయుడు, జూనియర్ పవర్ స్టార్ అవుతాడు.! ఇది సహజంగానే వినిపించే మాటే.! కానీ, ‘నా కుమారుడిని జూనియర్ పవర్ స్టార్ అనొద్దు. అది కళ్యాణ్ గారికీ ఇష్టం లేదు. అకిరానందన్ కూడా దాన్ని ఇష్టపడడు..’ అంటూ అకిరానదన్ తల్లి రేణు దేశాయ్ పలు సందర్భాల్లో చెప్పడం, పవన్ కళ్యాణ్ అభిమానులకు అస్సలు మింగుడు పడలేదు.
‘జూనియర్ అన్న ప్రస్తావన’ సర్వసాధారణం. చిరంజీవి కొడుకు, జూనియర్ చిరంజీవి.. అక్కినేని నాగేశ్వరరావు తనయుడు, జూనియర్ అక్కినేని.. ఇది సహజమైన ప్రస్తావనే. చిరంజీవి తనయుడు మెగా పవర్ స్టార్ అయితే, అక్కినేని తనయుడ్ని యువ సమ్రాట్గా అభిమానులు పిలుచుకోవడం.. తెలిసిన విషయమే.
కింగ్ అక్కినేని నాగార్జున, గ్లోబల్ స్టార్ రామ్ చరణ్.. ఇలా కాలక్రమంలో అన్నీ మారుతుంటాయ్. ఇంతకీ, సినిమాలపై అకిరానందన్కి ఆసక్తి వుందా.? లేదా.? వుండకుండా ఎందుకుంటుంది.? తల్లి రేణు దేశాయ్ సినీ నటి, తండ్రి పవన్ కళ్యాణ్ సినీ నటుడు. సో, అకిరానందన్ కూడా సినిమాల్లోకి ఖచ్చితంగా వస్తాడు.
మరి, జనసైనికులేంటీ, ‘అకిరానందన్.. నువ్వు రాజకీయాల్లోకి వచ్చెయ్..’ అంటున్నారు.? అది జనసైనికుల అభిమానం మరి.! ‘నాన్నగారికి తోడుగా రాజకీయాల్లో నువ్వుంటే బావుంటుంది..’ అంటూ జనసైనికులు, సోషల్ మీడియా వేదికగా అకిరానందన్ని కోరుతుండడం ఒకింత ఆశ్చర్యకరమే.
ఎన్నికల్లో గెలిచాక, కుమారుడు అకినందన్ని వెంటేసుకుని, మంగళగిరిలోని జనసేన పార్టీ కార్యలయానికి చేరుకున్నారు జనసేనాని. అక్కడే, తన కుమారుడిని టీడీపీ అధినేత చంద్రబాబుకి జనసేనాని పరిచయం చేశారు. అంతే కాదు, ఢిల్లీకి తన కుమారుడిని తీసుకెళ్ళి, ప్రధాని నరేంద్ర మోడీకి పరిచయం చేశారు జనసేనాని.
వాస్తవానికి, ఇవన్నీ మర్యాదపూర్వక భేటీలే.! ఇదీ నా కుటుంబం.. అని జనసేనాని, ‘కొంతమందికి’ స్పష్టమైన సంకేతాలు ఇచ్చినట్లయ్యింది.
అకిరానందన్ ఇంకా చిన్న పిల్లాడు. చదువుకుంటున్నాడు. సినిమాకి సంబంధించి చాలా నేర్చుకోవాల్సి వుంది. సినిమాలపై అతనే నిర్ణయం తీసుకోవాలి. ఇక, రాజకీయాలంటారా.? ఇప్పుడైతే ఆ ప్రస్తావన అనవసరమే అనిపిస్తుంది. కానీ, రాజకీయాలపై అతనికి ఆసక్తి వుంటే.. ఏమో, ఏదైనా జరగొచ్చు.