జీఎస్టీ రగడ: ప్రధాని మోడీకి కేసీఆర్‌ లేఖాస్త్రం.!

జీఎస్టీ.. ఇది అర్థం కానంత జడపదార్థమేమీ కాదు. ఒకటే దేశం.. ఒకటే పన్ను విధానం.. అంటూ ‘జీఎస్టీ’ని తెరపైకి తెచ్చింది కేంద్రం. రాష్ట్రాల నుంచి కొన్ని అభ్యంతరాలు వచ్చినా, కేంద్రం దూకుడుగా వ్యవహరించింది. ఈ క్రమంలో మొదట ఆక్షేపించిన రాష్ట్రాలే.. ఆ తర్వాత బేషరతుగా కేంద్రానికి మద్దతిచ్చాయి. కాంగ్రెస్‌ హయాంలో తెరపైకి వచ్చిన జీఎస్టీ, ఎన్డీయే హయాంలో అమల్లోకి వచ్చిన విషయం విదితమే.

ఇప్పుడీ జీఎస్టీ రాష్ట్రాల్ని ఇరకాటంలో పడేసింది. రాష్ట్రాలకు కేంద్రం చెల్లించాల్సిన జీఎస్టీ బకాయిలు కరోనా నేపథ్యంలో ఏప్రిల్‌ నుంచి నిలిచిపోయాయి. బకాయిల చెల్లింపు విషయమై రాష్ట్రాలు ఎంతలా మొరపెట్టుకుంటున్నా కేంద్రం పట్టించుకోవడంలేదు. పైగా, ‘రెండు ఆప్షన్స్‌..’ అంటూ రాష్ట్రాల్ని మభ్యపెట్టేందుకు కేంద్రం ప్రయత్నిస్తోంది. ఈ విషయమై తెలంగాణ ముఖ్యమంత్రి కల్వకుంట్ల చంద్రశేఖర్‌రావు, ప్రధాని నరేంద్ర మోడీకి లేఖాస్త్రం సంధించారు.

‘కరోనా నేపథ్యంలో రాష్ట్రాలకు సాయం చేయాల్సింది పోయి.. కోత విధిస్తారా.?’ అంటూ లేఖలో నిలదీశారు కేసీఆర్‌. జీఎస్టీ బకాయిలు చెల్లించాల్సింది పోయి, రాష్ట్రాలు అప్పులు తీసుకోవాలని కేంద్రం అనడం బాధ్యతారాహిత్యమన్నది కేసీఆర్‌ వాదన. జీఎస్టీకి తొలుత మద్దతు పలికిన రాష్ట్రం తెలంగాణ.. అంటూ కేసీఆర్‌, తన లేఖలో ప్రస్తావించారు. ‘రాష్ట్రాలు అభివృద్ధి చెందితేనే దేశం అభివృద్ధి చెందుతుంది. రాష్ట్రాలు ఇబ్బందుల్లో వున్నప్పుడు కేంద్రం ఇతోదికంగా సాయం చేయాలి. సాయం చేయడం సంగతి తర్వాత, రాష్ట్రాలకు రావాల్సిన బకాయిల్ని చెల్లించడం అనేది కేంద్రం విధి..’ అని కేసీఆర్‌ తెగేసి చెప్పారు.

ఇంతకీ, కరోనా నేపథ్యంలో ప్రధాని నరేంద్ర మోడీ ప్రకటించిన ‘ఆత్మ నిర్బర భారత్‌ అభియాన్‌’ ప్యాకేజీ ఏమయినట్లు.? రాష్ట్రాలకు ఈ ప్యాకేజీతో ప్రయోజనం ఏమైనా కలిగిందా.? లేదా.? వంటి ప్రశ్నలకు సమాధానం తెలియాల్సి వుంది. నిజానికి, ఈ ప్యాకేజీతో ప్రజలకు ఎలాంటి ఉపయోగం లేదని చాలా రాష్ట్రాలు, రాజకీయ విశ్లేషకులు, ఆర్థిక రంగ నిపుణులు కూడా అభిప్రాయ పడిన విషయం విదితమే. ఏదిఏమైనా, జీఎస్టీ అనేది అనూహ్యంగా ఇప్పుడు ‘గుదిబండ’ అయి కూర్చుంది రాష్ట్రాలకి. ఒకే దేశం.. ఒకే పన్ను విధానం.. అన్నది పేరుకేగానీ, ఆ జీఎస్టీ పరిధిలోకి పెట్రో ఉత్పత్తుల్ని ఇంకా తీసుకురాలేనంత అసమర్థత మన ప్రభుత్వాలది.