తెలంగాణ సెక్రెటేరియట్‌ కూల్చివేత.. ఇప్పుడే అవసరమా.!

తెలంగాణ ప్రభుత్వం ప్రస్తుత సెక్రెటేరియట్‌ స్థానంలో కొత్త సెక్రెటేరియట్‌ నిర్మించేందుకు వడివడిగా అడుగులు వేస్తోంది. నిజానికి, చాలా కాలం క్రిందటే ఈ ప్రతిపాదనను తెలంగాణ ప్రభుత్వం తెరపైకి తెచ్చింది. కోర్టులో ప్రభుత్వ నిర్ణయానికి వ్యతిరేకంగా పిటిషన్లు దాఖలవడంతో కాస్త ఆలస్యమయ్యిందంతే. సెక్రెటేరియట్‌ కూల్చివేతపై న్యాయపరమైన చిక్కులు తొలగిపోవడంతో నిన్న రాత్రి నుంచి కూల్చివేతలు మొదలయ్యాయి. అతి తక్కువ సమయంలోనే మొత్తం కూల్చివేత పూర్తయిపోతుదట. అవును మరి.. దేన్నయినా కట్టాలంటే ఎక్కువ సమయం పడుతుందిగానీ, కూల్చివేయడం పెద్ద కష్టం కాదు కదా.!

అయితే, తెలంగాణలో కరోనా వైరస్‌ వ్యాప్తి అత్యంత ప్రమాదకరమైన స్థితిలో వున్న ప్రస్తుత తరుణంలో సెక్రెటేరియట్‌ని కూల్చివేయడం ఎంతవరకు సబబు.? అన్న ప్రశ్న విపక్షాల నుంచే కాదు, ప్రజల నుంచి కూడా వస్తోంది. సెక్రెటేరియట్‌ని తాత్కాలికంగా కొంత కాలం పాటు కరోనా ఐసోలేషన్‌ కోసం వాడుకుని వుంటే బావుంటుందనే డిమాండ్‌ ఇప్పటికే విపక్షాల నుంచి వచ్చింది. సాధారణ ప్రజానీకం కూడా ఇదే అభిప్రాయాన్ని వ్యక్తం చేస్తున్నారు.

కరోనా టెస్టుల విషయంలో పలుమార్లు హైకోర్టు మొట్టికాయలు వేసినా, చేయాల్సిన స్థాయిలో కరోనా టెస్టులు చేయని తెలంగాణ ప్రభుత్వం, సెక్రెటేరియట్‌ కూల్చివేతలో మాత్రం అత్యుత్సాహం ప్రదర్శించడం అందర్నీ విస్మయానికి గురిచేస్తోంది. ‘వేర్‌ ఈజ్‌ కేసీఆర్‌’ అంటూ సచివాలయం కూల్చివేతపై కూడా కేసీఆర్‌ని నెటిజన్లు ప్రశ్నిస్తున్నారు.

అయితే, ఉమ్మడి ఆంధ్రప్రదేశ్‌ విడిపోయాక, ఈ సక్రెటేరియట్‌లో వాస్తు దోషాలంటూ పదే పదే ఆరోపించిన తెలంగాణ ముఖ్యమంత్రి కేసీఆర్‌, ముఖ్యమంత్రి హోదాలో సెక్రెటేరియట్‌ వైపు చూసింది కూడా లేదు. ‘దేశంలో సెక్రెటేరియట్‌కి వెళ్ళని ఏకైక ముఖ్యమంత్రి..’ అనే విమర్శల్ని కూడా కేసీఆర్‌ ఎదుర్కొన్నారు. మరోపక్క, పాత సెక్రెటేరియట్‌ కూల్చేసి, ఆ స్థానంలో నిర్మించ తలపెట్టిన కొత్త సెక్రెటేరియట్‌ డిజైన్‌ కూడా దాదాపు ఖరారైపోయినట్లు తెలుస్తోంది. ఇప్పటికే ఆ డిజైన్‌ సోషల్‌ మీడియాలో చక్కర్లు కొడుతోంది.

అయితే, రాత్రికి రాత్రి దేన్నయినా కూల్చేయొచ్చుగానీ.. నిర్మించడానికి చాలా సమయం పడుతుంది కదా.! మరి, తెలంగాణ కొత్త సెక్రెటేరియట్‌ ఎప్పటికి నిర్మాణం పూర్తి చేసుకుంటుంది.? ఈలోగా తెలంగాణ సమాజానికి ప్రభుత్వ పెద్దలు ఏం సమాధానం చెప్పగలుగుతారు.?