మొత్తానికి మోదీ నుంచి బాబుకు ఫోన్

లాక్ డౌన్ పొడిగింపు విషయంలో ప్రధాని నరేంద్ర మోదీ వివిధ పార్టీలకు చెందిన పలువురు నేతలతో మాట్లాడినప్పటికీ, తనతో మాట్లాడకపోవడంపై తెగ బాధపడిపోయిన టీడీపీ అధినేత చంద్రబాబు ఈరోజు కాస్త ఊరట పొంది ఉంటారు. ప్రధాని మోదీ ఆయనకు ఫోన్ చేసి మాట్లాడమే ఇందుకు కారణం. లాక్ డౌన్ పొడిగింపుపై జాతినుద్దేశించి ప్రసంగించడానికి ముందు మోదీ నుంచి బాబుకు ఫోన్ వచ్చింది. ఈ విషయాన్ని చంద్రబాబు స్వయంగా వెల్లడించారు. కేంద్రం తీసుకున్న లాక్ డౌన్ నిర్ణయాన్ని సమర్థిస్తున్నట్టు చెప్పారు.

కరోనా నియంత్రణకు తాను కొన్ని సూచనలతో ప్రధానికి లేఖ రాశానని తెలిపారు. అలాగే ప్రధానితో మాట్లాడాని నిన్న సాయంత్రం కోరగా.. మంగళవారం ఉదయం మోదీ తనకు ఫోన్ చేసి మాట్లాడారని చెప్పారు. ఈ సందర్భంగా కరోనాపై తాము చేసిన అధ్యయన వివరాలను ఆయనకు తెలియజేశానన్నారు.

2014 ఎన్నికల్లో బీజేపీతో కలిసి పోటీచేసిన చంద్రబాబు.. మొన్నటి ఎన్నికల్లో ఎన్డీఏ నుంచి బయటకు వచ్చి ఒంటరిగా పోటీ చేశారు. కానీ చిత్తుగా ఓడిపోయారు. ఎన్నికల సందర్భంగా మోదీని ఓడించేందుకే సర్వశక్తులూ ఒడ్డారు. కాంగ్రెస్ తో చేతులు కలిపి వారికి అనేక రకాలుగా సాయం చేశారు. అయితే, బీజేపీనే మళ్లీ కేంద్రంలో అధికారంలోకి రావడంతో బాబు మళ్లీ వారికి దగ్గరయ్యేందుకు పలు ప్రయత్నాలు చేశారు.

కానీ, ఎన్నికల సందర్భంగా బాబు వ్యవహరించిన తీరును మరచిపోని కమలనాథులు.. ఆయన్ను పట్టించుకోవడంలేదు. ఈ నేపథ్యంలోనే కరోనా నియంత్రణపై పలు పార్టీల అధినేతలతో మోదీ స్వయంగా మాట్లాడినప్పటికీ బాబును లెక్కలోకి తీసుకోలేదు. దీంతో అప్పటి నుంచి మోదీ కటాక్షం కోసం ప్రయత్నాలు చేస్తున్న బాబు ఎట్టకేలకు అనుకున్నది సాధించారు.

స్వయంగా మోదీయే బాబుకు ఫోన్ చేసి మాట్లాడటంతో వెంటనే వీడియో కాన్ఫరెన్స్ ద్వారా విలేకరుల సమావేశం పెట్టి ఈ విషయం చెప్పారు. అలాగే ఏపీ సీఎం జగన్ సూచించిన రెడ్, ఆరెంజ్, గ్రీన్ జోన్లను అమలు చేయాలని ప్రతిపాదించినట్టు బాబు వెల్లడించడం విశేషం.