గ్రామ వాలంటీర్లు.. ‘నిలువు దోపిడీ’ చేసేస్తున్నారా.?

ఓ పక్క కరోనా మహమ్మారి ప్రపంచాన్ని ముంచేస్తోంటే, ఆంధ్రప్రదేశ్‌లో షరా మామూలుగా రాజకీయ రచ్చ కొనసాగుతోంది. దేశవ్యాప్త లాక్‌డౌన్‌కి తోడు, ఆంధ్రప్రదేశ్‌లోనూ కరోనా వైరస్‌ కేసులు రోజురోజుకీ పెరుగుతున్నాయి. ‘గ్రామ వాలంటీర్ల’ పేరుతో వైఎస్‌ జగన్‌ ప్రభుత్వం చేస్తున్న పబ్లిసిటీ స్టంట్లు ఒకింత హాస్యాస్పదంగా మారుతున్న పరిస్థితిని చూస్తున్నాం. అయితే, చాలా చోట్ల గ్రామ వాలంటీర్లు అత్యంత బాధ్యతాయుతంగా వ్యవహరిస్తున్న తీరుని ప్రశంసించకుండా వుండలేం.

అదే సమయంలో, కొందరు వాలంటీర్ల ‘కక్కుర్తి’నీ ప్రశ్నించకుండా వుండలేం. ప్యాకెట్ల రూపంలో ప్రభుత్వం, ప్రజలకు రేషన్‌ అందిస్తోన్న విషయం విదితమే. అందులో దోపిడీకి వాలంటీర్లు పాల్పడుతున్నారంటూ సాక్ష్యాధారాలతో సహా సోషల్‌ మీడియాలో కుప్పలు తెప్పలుగా పోస్టింగ్స్‌ కన్పిస్తున్నాయి. మరోపక్క, సామాజిక పెన్షన్ల నుంచీ కొందరు వాలంటీర్లు కమిషన్‌ దండుకుంటున్న వైనం వెలుగు చూస్తోంది.

వాలంటీర్లకు సంబంధించిన ఓ వాట్సాప్‌ గ్రూప్‌లో, ఏ పెన్షన్‌ నుంచి ఎంత కమిషన్‌ రాబట్టాలనే విషయం స్పష్టంగా కన్పిస్తోంది. అయితే, సోషల్‌ మీడియాలో వచ్చే కథనాల్ని పూర్తిగా నమ్మేయడానికి వీల్లేదు. అదే సమయంలో, జరుగుతున్న అక్రమాలపై జనం ఎవరికీ ఫిర్యాదు చేయలేక, సోషల్‌ మీడియాని ఆశ్రయిస్తున్నారన్న వాదనల్నీ కొట్టి పారేయడానికి వీల్లేదు.

ఈ వ్యవహారంపై రాజకీయ విమర్శలు రావడం సహజమే. ఆ విమర్శల్ని తిప్పికొట్టే క్రమంలో అధికార పార్టీ నేతలు ప్రదర్శిస్తున్న అత్యుత్సాహం మరింత రాజకీయ దుమారానికి కారణమవుతోంది. విపక్షాల విమర్శల నేపథ్యంలో, గ్రామ వాలంటీర్లపై ఆరోపణలు అవాస్తవమని ప్రభుత్వం తరఫున అధికార పార్టీ నేతలు స్పష్టతనివ్వడం మంచిదే.

కానీ, ఆ పేరుతో రాజకీయ విమర్శల పర్వం కొనసాగిస్తే దాని వల్ల ప్రయోజనమేంటి.? ఇది కష్ట కాలం.. అధికార పార్టీ ‘పెద్దన్న’ పాత్ర పోషించి అన్ని రాజకీయ పార్టీల్నీ కలుపుకుపోవాలి. విపక్షాల నుంచి వచ్చే విమర్శలు కావొచ్చు, సూచనలు కావొచ్చు.. వాటిని అధికార పక్షం పరిగణనలోకి తీసుకుంటే, ప్రజలకు మరింత మెరుగైన పాలన అందుతుంది.