రైతులు చనిపోతుంటే.. అది ‘వార్త’ కాదా.?

మంత్రి తానేటి వనిత కాన్వాయ్‌ కారణంగా ఓ ప్రమాదం చోటు చేసుకుంది. ఈ ప్రమాదంలో ఓ వ్యక్తి మృతి చెందాడు. మరోపక్క, కాన్వాయ్‌లోని మంత్రి వాహనం స్వల్ప ప్రమాదానికి గురయ్యింది.. ఈ ప్రమాదంలో మంత్రిగారికి స్వల్పంగా గాయాలయ్యాయట. వైఎస్సార్‌ కాంగ్రెస్‌ పార్టీ అధికార పత్రిక, ఛానెల్‌లో వచ్చిన వార్త, ‘మంత్రి కారుకి ప్రమాదం.. మంత్రిగారికి స్వల్ప గాయాలు..’ అని. ఓ వ్యక్తి చనిపోయాడన్న వార్తని కవర్‌ చేయడానికి కూడా సదరు మీడియా సంస్థ ఆసక్తి చూపకపోవడం విమర్శలకు తావిస్తోంది.

రాష్ట్రంలో ఇసుక కొరత కారణంగా భవన నిర్మాణ రంగ కార్మికులు ప్రాణాలు కోల్పోతే.. అది ‘డ్రామా’గా సాక్షి మీడియా, వైఎస్సార్‌ కాంగ్రెస్‌ పార్టీ నేతలు అభివర్ణించిన విషయం విదితమే. ఇక, రాజధాని అమరావతిలో రైతులు ప్రాణాలు కోల్పోతోంటే, దాన్నీ అధికార పార్టీతోపాటు సాక్షి మీడియా వెటకారం చేస్తున్న తీరుని చూస్తూనే వున్నాం.

‘జాగ్రత్త.. ప్రతిపక్షం హత్యలు చేసి, ఆత్మహత్యలుగా ప్రచారం చేసే అవకాశం వుంది..’ అంటూ వైఎస్సార్సీపీ ముఖ్య నేత ఒకరు గతంలో చేసిన వ్యాఖ్యలు.. ప్రజల ప్రాణాల పట్ట ఆ పార్టీకి వున్న చిత్తశుద్ధిని చెప్పకనే చెబుతున్నాయి. అమరావతిని నాశనం చేస్తున్నారనే ఆవేదన ఓ పక్క.. తమ ఉద్యమాన్ని చిన్న చూపు చూస్తున్నారనే మనోవేదన ఇంకో వైపు.. వెరసి, రాజధానిలో సున్నిత మనస్కుల ప్రాణాలు బలిగొంటున్నాయి.

రోమ్‌ తగలబడిపోతోంటే, నీరో చక్రవర్తి ఫిడేల్‌ వాయించాడో లేదోగానీ.. అమరావతిలో రైతులు ప్రాణాలు కోల్పోతోంటే.. ముఖ్యమంత్రి వైఎస్‌ జగన్‌ మోహన్‌రెడ్డి మాత్రం సంక్రాంతి సంబరాల్లో మునిగి తేలడం ప్రపంచమంతా చూస్తోంది.