ఎలా ఉండే వర్మ ఎలా అయిపోయాడు!

రామ్ గోపాల్ వర్మ అంటే ఒకప్పుడు కాబోయే దర్శకులలో ఎంతో క్రేజ్ ఉండేది. దర్శకుడు కావాలనుకునే ప్రతి ఒక్కరూ ఒక్క సినిమాకైనా వర్మ దగ్గర శిష్యరికం చేయాలని ఉబలాటపడిన వాళ్ళే. ఒకప్పుడు ఎలా సినిమాలు తీయాలో అందరికీ చూపిన వర్మ ఇప్పుడు ఎలా తీయకూడదో అన్నట్లుగా సినిమాలు చేస్తూ అందరినీ విసిగిస్తున్నాడు. రామ్ గోపాల్ వర్మ దగ్గరనుండి ఒక నిఖార్సైన సినిమా వచ్చి ఎన్నేళ్లు అయిందో లెక్కపెట్టడం కూడా కష్టం.

ఒకప్పుడు ఎలాంటి కథతో సినిమాలు తీయాలోనని ఆలోచించిన వర్మ ఇప్పుడు కథ కంటే ముందు కథలో ఎంత కాంట్రవర్సీ పాయింట్ ఉంది లేదా హీరోయిన్ అందాలను చూపించడానికి ఎంత స్కోప్ ఉంది అంటూ వివిధ రకాలుగా ఆలోచిస్తున్నాడు. ఒక కథలో కాంట్రవర్సీ ఉందని తెలిస్తే చాలు దానిపై చక్కగా వాలిపోతున్నాడు. ఈ ఏడాది లక్ష్మీస్ ఎన్టీఆర్, అమ్మ రాజ్యంలో కడప రెడ్లు సినిమాతో వర్మ బాగానే వెనకేసుకున్నాడు. అయితే ఈ సినిమా క్వాలిటీ విషయంలో మాత్రం విమర్శలు ఎదుర్కోవాల్సిన పరిస్థితి. అమ్మ రాజ్యంలో సినిమాకైతే ఎన్నెన్ని విమర్శలు వచ్చాయో కొత్తగా చెప్పాల్సిన పనిలేదు. ఈ నేపథ్యంలో రామ్ గోపాల్ వర్మ పప్పులు ఉడకవని అంతా భావించారు.

అయితే సినిమాను ఏం చేసైనా సరే మార్కెట్ చేసుకోవడం, తన సినిమా గురించి అందరూ మాట్లాడేలా చేయడం వర్మ స్టైల్. తన లేటెస్ట్ సినిమా బ్యూటిఫుల్ ను ఎవరూ కేర్ చెయ్యట్లేదు. హీరోయిన్ నైనా గంగూలీ అందాలను ఎంతలా ఎర వేస్తున్నా కూడా పట్టించుకోవట్లేదు. అందుకే వర్మ ఈ చిత్రానికి ప్రీ రిలీజ్ ఈవెంట్ ఒకటి కండక్ట్ చేసాడు. సాధారణంగా తన స్పీచ్ లతో అందరినీ అలరించే వర్మ ఈసారి స్టేజ్ మీద హీరోయిన్ తో కలిసి విచిత్రమైన డ్యాన్స్ లు వేస్తూ చిత్రవిచిత్రంగా బిహేవ్ చేసాడు. పబ్లిసిటీ కోసం వర్మ ఎంతలా దిగజారిపోయాడో, ఎలా ఉండే వర్మ ఎలా అయిపోయాడోనని ఫిల్మ్ నగర్ కూడళ్లలో చర్చించుకుంటున్నారు.