సాహోరే.. ప్రభాస్‌, శ్రద్ధా.. అదరగొట్టేశారంతే.!

యంగ్‌ రెబల్‌ స్టార్‌ ప్రభాస్‌ త్వరలో ‘సాహో’ సినిమాతో ప్రేక్షకుల ముందుకు రానున్న విషయమే. ‘బాహుబలి’ తర్వాత ప్రభాస్‌ హీరోగా వస్తున్న సినిమా ఇది. ‘బాహుబలి’ రేంజ్‌లో ‘సాహో’ని ఊహించుకోగలమా.? ఆ స్థాయిని ప్రభాస్‌ మళ్ళీ అందుకుంటాడా.? తొలి సారి తెలుగు తెరపై మెరవనున్న శ్రద్ధా కపూర్‌, తొలి సినిమాతోనే తెలుగు ప్రేక్షకుల్ని తన వలలో వేసుకుంటుందా.? ‘రన్‌ రాజా రన్‌’ సక్సెస్‌ తర్వాత, ప్రభాస్‌ కోసమే ఇన్నేళ్ళు ఎదురుచూసిన దర్శకుడు సుజీత్‌, ‘సాహో’తో ఎలాంటి విజయాన్ని ఇవ్వబోతున్నాడు? ఇలా చాలా ప్రశ్నలున్నాయి. ఆ ప్రశ్నలకు సమాధానాలు తెలియాలంటే ఆగస్ట్‌ 30 వరకు వేచి చూడాల్సిందే.

ఈలోగా సినిమాపై అంచనాలు పెంచేయడానికి టీమ్‌ ‘సాహో’ ప్రచార కార్యక్రమాల్ని ఉధృతం చేసింది. తాజాగా ‘సాహో’ నుంచి రెండో ఆడియో సింగిల్‌ని విడుదల చేశారు. తొలి సాంగ్‌ టీజర్‌ ‘సైకో సయ్యా’ సూపర్‌ సెన్సేషన్‌గా మారిన విషయం విదితమే. ఇక, రెండో ఆడియో సింగిల్‌ ‘ఏ చోట నువ్వున్నా’ సాంగ్‌ టీజర్‌ బయటకొచ్చింది. వస్తూనే, సోషల్‌ మీడియాలో వివిధ భాషల్లో హోరెత్తించేస్తోంది.

ప్రభాస్‌, శ్రద్ధా కపూర్‌ల కోసం డిజైన్‌ చేసిన కాస్ట్యూమ్స్‌ ఈ సాంగ్‌ ప్రత్యేకతగా చెప్పుకోవాలేమో. ఇప్పటిదాకా ఎప్పుడూ ఏ సినిమాలోనూ చూడని లొకేషన్స్‌లో ‘ఏ చోట నువ్వున్నా’ సాంగ్‌ని పిక్చరైజ్‌ చేశారు. ఆ అందమైన లొకేషన్స్‌ని ప్రభాస్‌ – శ్రద్ధా జంట తమ గ్లామర్‌తో డామినేట్‌ చేసేశారు. సినిమాటోగ్రఫీ, మ్యూజిక్‌ చాలా చాలా బావున్నాయి.

ప్రభాస్‌ గురించి కొత్తగా చెప్పేదేముంది.. హ్యాండ్సమ్‌ హంక్‌ ఆఫ్‌ తెలుగు సినిమా.. కాదు కాదు, హ్యాండ్సమ్‌ హంక్‌ ఆఫ్‌ ఇండియన్‌ సినిమా.. అని ప్రభాస్‌ గురించి ఇంకోసారి గట్టిగా చెప్పేసుకోవచ్చు. శ్రద్ధా కపూర్‌ చాలా బ్రైట్‌గా వుంది ఈ ‘ఏ చోట నువ్వున్నా’ సాంగ్‌లో. మొత్తమ్మీద, విడుదలైన కొద్ది నిమిషాల్లోనే సంచలనాలు షురూ చేసిన ‘ఏ చోట నువ్వున్నా’ సాంగ్‌ టీజర్‌.. సినిమాపై అంచనాల్ని మరింతగా పెంచేస్తుందనడం నిస్సందేహమే.