‘అందుకే నిద్ర లేవగానే సావిత్రి ఫోటో చూస్తాను’: మెగాస్టార్ చిరంజీవి

అలనాటి నటి సావిత్రి సినిమా ప్రస్థానాన్ని ఆధారంగా చేసుకుని ‘సావిత్రి క్లాసిక్స్’ పేరుతో పుస్తకాన్ని ఆవిష్కరించారు. హైదరాబాద్ లో జరిగిన ఈ కార్యక్రమానికి ‘పద్మ విభూషణ్’ మెగాస్టార్ చిరంజీవి ( Chiranjeevi) ముఖ్య అతిథిగా హాజరయ్యారు. ఈ కార్యక్రమం లో ఆయన మాట్లాడుతూ.. సావిత్రి తో ఆయనకున్న అనుబంధాన్ని గుర్తు చేసుకుని ఎమోషనల్ అయ్యారు.

‘ మా నాన్నకి సావిత్రి అంటే ఎంతో అభిమానం. ఆయనతో కలిసి ఆ మహానటి సినిమాలు చూస్తూ ఉండేవాడిని. అలా తెలియకుండానే చిన్నప్పటినుంచి ఆమె మీద అభిమానం ఏర్పడింది. నా మొదటి సినిమా ‘పునాది రాళ్లు’ షూటింగ్ సమయంలో తొలిసారి ఆమెని నేరుగా కలిసే అవకాశం వచ్చింది. షూటింగ్ విరామ సమయంలో డాన్స్ చేయమని అడిగేవారు. నా డాన్స్ చూసి ఆమె చప్పట్లు కొడుతూ ఉంటే గర్వంగా అనిపించేది. ఆమెతో రెండు సినిమాలు చేశాను. నటన పరంగా ఎన్నో విషయాలు ఆమె నుంచి నేర్చుకున్నాను. సావిత్రి ఆశీస్సులే నన్ను ఈరోజు ఈ స్థాయిలో ఉంచాయని నమ్ముతున్నాను. అందుకే రోజు నిద్ర లేవగానే ఆమె ఫోటోనే చూస్తాను. అలాంటి నటి మీద రాసిన పుస్తకం నా చేతుల మీదుగా ఆవిష్కరించడం సంతోషంగా ఉంది’ అని అన్నారు.

‘సావిత్రి నటన తెలియాలంటే ఆ ఒక్క పాట చూస్తే చాలు’

‘సావిత్రి క్లాసిక్స్’ పుస్తక ఆవిష్కరణ కార్యక్రమంలో పాల్గొన్న సీనియర్ నటుడు బ్రహ్మానందం మాట్లాడుతూ… ‘ సావిత్రి గురించి తర్వాత తరాలకు తెలిసేలా పుస్తకాన్ని రచించిన సంజయ్ కిషోర్ కి, ఆ పుస్తకాన్ని ఆవిష్కరించేందుకు ఇంత మంచి కార్యక్రమం జరగడానికి కారణమైన మెగాస్టార్ చిరంజీవికి ధన్యవాదాలు. నేను నటుడిగా కెరీర్ మొదలుపెట్టిన తొలినాళ్లలో నా నటన బాగుందని ఎవరైనా ప్రశంసిస్తే సంతోషించే వాడిని. నటన మెరుగుపరచుకోవడానికి నేను సావిత్రి సినిమాలు ఎక్కువ చూసేవాడిని. అందులో భాగంగా డాక్టర్ చక్రవర్తి సినిమాలోని ‘నువ్వు లేక వీణ’ పాటని ఎన్నోసార్లు చూశాను. అందులో ఆమె పలికించే హవ భావాలకి నేను పెద్ద అభిమానిని. ఆ ఒక్క పాట చాలు ఆమె నట శిఖరం అని చెప్పడానికి. ఎస్వీ రంగారావు-సావిత్రి కలిసి నటించిన సినిమాలు నటనాపరంగా చాలా నేర్చుకున్నాను. ఆ సినిమాల్లో వాళ్ళిద్దరూ పోటీపడి నటించేవారు. అంతటి నటి గురించి తర్వాత తరాలకు కూడా తెలియాల్సిన అవసరం ఉంది’ అని అన్నారు.