’50మంది రాడ్లు, రాళ్లతో దాడి చేశారు..’ యువతి కిడ్నాప్ పై తండ్రి ఫిర్యాదు

ప్రేమించిన యువతి మరొకరితో పెళ్లికి సిద్ధమవుతోందని ప్రియుడే కిడ్నాప్ కు పాల్పడిన ఘటన హైదరాబాద్ శివారు మన్నెగూడలో జరిగింది. ఘటనపై యువతి తండ్రి దామోదర్ రెడ్డి ఫిర్యాదుతో ఆదిభట్ల పోలిస్ స్టేషన్లో కేసు నమోదైంది. కేసులో ప్రధాన నిందితుడిగా ఉన్న నవీన్ రెడ్డి, అనుచరులపై హత్యాయత్నం, కిడ్నాప్, దాడితోపాటు పలు కేసులు నమోదు చేశారు. ఇప్పటివరకూ 16 మందిని అదుపులోకి తీసుకుని దాడికి వాడిన కారు, బొలెరోను స్వాధీనం చేసుకున్నారు. వివరాల్లోకి వెళ్తే..

రెండేళ్లుగా ప్రేమ, పెళ్లి పేరుతో తన కుమార్తెను నవీన్ వేధిస్తున్నాడు. నవీన్ మొదటి నుంచీ సైకోలా వ్యవహరిస్తున్నాడు. పెళ్లి జరిగిందని నమ్మించేందుకు ఎన్నో కుట్రలు చేశాడు. నా కుమార్తెతో దిగిన ఫోటోలను పెళ్లి ప్రచారానికి వాడుకున్నాడు. వాహనం కొనుగోలు చేసి నామినీగా నా కుమార్తె పేరును భార్య స్థానంలో రాయించుకున్నాడు. గత ఆగష్టు 27న పెళ్లైందని.. తన భార్యను కాపురానికి పంపడంలేదని ఎల్బీనగర్ కోర్టులో పిటిషన్ వేశాడు. నిజానికి ఆరోజు నా కుమార్తె ఆసుపత్రిలో ఉంది. పెళ్లిపై నవీన్ అబద్ధం చెప్తున్నాడు’.

‘దాడి సమయంలో నవీన్ రెడ్డి, రూబెన్ తోసహా 50 మంది అనుచరులు నా ఇంటిపై దాడి చేశారు. ఐరన్ రాడ్లు, రాళ్లతో ఇంట్లోకి ప్రవేశించారు. నా తలపై రాడ్డుతో దాడి చేశారు. నా స్నేహితులను గాయపరిచారు. ఇంట్లో ఉన్న సామాగ్రి, సీసీ కెమెరాలు ధ్వంసం చేశారు. నా కుమార్తెను బలవంతంగా ఎత్తుకెళ్లారు. నా కుమార్తె, కుటుంబసభ్యులను చంపే కుట్రతో వచ్చారు’ అని అన్నారు.

కిడ్నాప్ వ్యవహారంపై రాష్ట్ర గవర్నర్ తమిళిసై ఆందోళన వ్యక్తం చేశారు. నిందితులపై చట్ట ప్రకారం చర్యలు తీసుకోవాలని.. యువతి కుటుంబ భద్రతపై చర్యలు తీసుకోవాలని కోరారు.