‘అడుక్కు తింటున్నారు’ అంటే అంత ఉలిక్కిపడ్డారెందుకు చెప్మా.?

ప్రతి నెలా కొత్త అప్పు చేస్తే తప్ప రాష్ట్రం మనుగడ సాధించలేని దుస్థితికి చేరింది. ఎవరు ఔనన్నా ఎవరు కాదన్నా ఆంద్రప్రదేశ్ రాష్ట్రం విషయంలో ఇదే వాస్తవం. ‘మేం రాష్ట్రాన్ని ఉద్ధరిస్తున్నాం..’ అని అధికార వైసీపీ ప్రచారం చేసుకుంటోందిగానీ, రాష్ట్రాన్ని పాలకులు అప్పుల్లో ముంచేస్తున్నారన్నది కఠోరమైన వాస్తవం.

దేశంలో ఏ రాష్ట్ర ఆర్థిక మంత్రీ పడనన్ని పాట్లు పడుతున్నారు ఏపీ ఆర్థిక మంత్రి బుగ్గన రాజేంద్రనాథ్. కొత్త అప్పులు ఎప్పటికప్పుడు అవసరమవడంతో, ఆ అప్పుల కోసం కేంద్రం నుంచి అనుమతి పొందేందుకు పదే పదే కేంద్ర ప్రభుత్వ పెద్దలతో భేటీ అవ్వాల్సి వస్తోంది.

ఒక్కమాటలో చెప్పాలంటే, ఆంధ్రప్రదేశ్ రాష్ట్రం పరిస్థితి, ‘అడుక్కు తినడమే’. ఇదే మాట తెలంగాణ మంత్రి ప్రశాంత్ రెడ్డి అనడంతో ఆంధ్రప్రదేశ్‌లోని అధికార పార్టీ నేతలకు ఒళ్ళు మండిపోయింది. ‘మేం రాష్ట్రానికి రావాల్సిన నిధుల గురించే కేంద్రాన్ని అడుక్కుంటున్నాం.. మీరు, ఢిల్లీకి వెళ్ళి ఏం బిచ్చమడుగుతున్నారు.?’ అంటూ ఏపీ మంత్రి పేర్ని నాని సెటైర్ వేశారు తెలంగాణ మంత్రి మీద.

ఏపీ ప్రభుత్వ సలహాదారు సజ్జల రామకృష్ణారెడ్డి కూడా తెలంగాణ మంత్రిపై గుస్సా అయ్యారు. తెలంగాణ మంత్రికి, ఆంధ్రప్రదేశ్ గురించి వెటకారం చేయాల్సిన అవసరం లేదు. నిజమే, ఆయన మాట్లాడిన మాటలు సమర్థనీయం కాదు. ఏ రాష్ట్ర అవసరాలు ఆ రాష్ట్రానివి. విభజన కారణంగానే ఆంధ్రప్రదేశ్ నష్టపోయింది. ఆ నష్టానికి కారణం, ముమ్మాటికీ విభజనవాదులే.

కానీ, ఆంధ్రప్రదేశ్ ప్రభుత్వం ఏం చేస్తోంది.? గతంలో చంద్రబాబు పాలన, ఇప్పుడు వైఎస్ జగన్ పాలన.. రెండూ కలిసి రాష్ట్రాన్ని మరింతగా అప్పుల్లో ముంచేస్తున్నాయి. ప్రతి నెలా కొత్త అప్పులు.. అప్పుల మీద అప్పులు.. వెరసి, గుక్క తిప్పుకోలేని పరిస్థితి. వినడానికి కొంచెం బాధాకరంగానే తెలంగాణ నేతల మాటలున్నా, ఆంధ్రప్రదేశ్ దుస్థితి కూడా అలాగే వుంది.

అబ్బే, అస్సలు తాము అప్పులు అడుక్కోవట్లేదని చెప్పే ధైర్యం ఆంధ్రప్రదేశ్ పాలకులకు వుందా.? అప్పు చేసి సంక్షేమ కూడు.. ఓటు బ్యాంకు రాజకీయాల కోసమే అయినా, రాష్ట్రం నాశనమైపోతోందిక్కడ.