పోలవరం ప్రాజెక్టుపై వైఎస్ జగన్ మాటల్లో నిగూడార్థమేంటి.?

పునరావాసం కల్పించకుండా పోలవరం ప్రాజెక్టులో నీళ్ళు నింపే ప్రసక్తే లేదని తెగేసి చెప్పారు ఆంధ్రప్రదేశ్ ముఖ్యమంత్రి, వైఎస్సార్ కాంగ్రెస్ పార్టీ అధినేత వైఎస్ జగన్ మోహన్ రెడ్డి. పోలవరం ముంపు ప్రాంతాల్లో వరద బాధితుల్ని పరామర్శించిన క్రమంలో పునరావాసంపై వచ్చిన ప్రశ్నలకు ముఖ్యమంత్రి పై విధంగా స్పందించారు.

నిజమే, ప్రాజెక్టు పూర్తవడమంటే.. ప్రాజెక్టు ముంపు ప్రజలకు పూర్తిస్థాయిలో పరిహారం అందించాక, ప్రాజెక్టులో నీళ్ళను నింపడం. నువ్వెక్కాల్సిన రైలు జీవితకాలం లేటు.. అన్నట్టు, పోలవరం ప్రాజెక్టు దశాబ్దాలుగా నలుగుతూనే వుందిగానీ, పూర్తవడంలేదు.

ఎప్పుడో బ్రిటిష్ హయాంలో పోలవరం ప్రాజెక్టు ఆలోచన జరిగితే, వైఎస్ రాజశేఖర్ రెడ్డి హయాంలో ’జలయజ్క్ష్ం‘ కింద పోలవరం ప్రాజెక్టు పేరుతో పబ్లిసిటీ స్టంట్ మరింత ముదిరి పాకాన పడింది. జాతీయ ప్రాజెక్టు హోదా వచ్చాక కూడా పోలవరం ప్రాజెక్టు.. గడచిన ఎనిమిదేళ్ళలో పూర్తికాలేకపోయిందంటే, ప్రాజెక్టు చుట్టూ ఎంత రాజకీయం నడుస్తోందో అర్థం చేసుకోవచ్చు.

సవరించిన అంచనాల ఆమోదం చుట్టూ నానా గందరగోళం నడుస్తోంది. ఈ విషయమై అటు కేంద్రానికీ, ఇటు రాష్ట్రానికీ స్పష్టత లేదు. మరెలా, పోలవరం ప్రాజెక్టు పూర్తవుతుంది. ముంపు పరిహారం బాధ్యత కేంద్రానిదా.? రాష్ట్రానిదా.? ఈ విషయమ్మీదనే స్పష్టత లేకుండా, ’వైఎస్ రాజశేఖర్ రెడ్డి ప్రారంభించిన ప్రాజెక్టుని పూర్తి చేసేది ఆయన తనయుడు వైఎస్ జగన్ మోహన్ రెడ్డి..‘ అంటోంది వైసీపీ.

అంతే కాదు, ప్రాజెక్టు సంగతి తర్వాత, ముందైతే వైఎస్ రాజశేఖర్ రెడ్డి విగ్రహాన్ని పెట్టాలన్నది వైసీపీ ఆలోచనగా కనిపిస్తోంది. పోలవరం ప్రాజెక్టుకి సంబంధించి గేట్ల నిర్మాణం దాదాపు పూర్తయిపోయింది. కానీ, ప్రాజెక్టులో నీళ్ళు నింపడానికి వీల్లేని పరిస్థితి. కాఫర్ డ్యామ్ విషయమై గందరగోళం, డయాఫ్రమ్ వాల్ అంటే ఏంటో సంబంధిత శాఖ మంత్రికి తెలియని వైనం.

2024 జూన్ లోపు ప్రాజెక్టు పూర్తయ్యే అవకాశం లేదని కేంద్రం తాజాగా వెల్లడించింది. ప్రాజెక్టు పూర్తయినా, నీళ్ళు వెంటనే నింపరనీ, అలా నింపితే డ్యామ్ భద్రతకు ముప్పు వాటిల్లుతుందని ముఖ్యమంత్రి చెబుతున్నారు. అంటే, 2027 వరకూ పోలవరం ప్రాజెక్టు మీద ఆశలు పెట్టుకోవాల్సిన పనిలేదన్నమాట. ఇదే ముఖ్యమంత్రి వైఎస్ జగన్ మాటల్లోని నిగూఢార్థమని అనుకోవాలా.?