బీజేపీలోకి వైసీపీ ఎమ్మెల్యే.? కళ్ళు పోతాయంతే.!

గత కొద్ది రోజులుగా వైసీపీకి చెందిన ఓ ఎమ్మెల్యే, భారతీయ జనతా పార్టీలోకి వెళ్ళబోతున్నారంటూ ప్రచారం జరుగుతోంది. ‘నిప్పు లేకుండా పొగ రాదు’ అన్న విషయాన్ని అన్నిటికీ వర్తింపజేసెయ్యలేం. రాజకీయాల్లో నిప్పు లేకుండానే పొగ వచ్చేస్తుంటుంది. ఒక్కోసారి, నిప్పు వున్నా కూడా పొగ రావడం కష్టం. అదే మరి, రాజకీయమంటే. ఇంతకీ, ఆ వైసీపీ ఎమ్మెల్యే ఎవరు.? అంటే, ఇంకెవరు నెల్లూరు జిల్లా గూడూరు ఎమ్మెల్యే వరప్రసాద్‌.

గతంలో వైసీపీ నుంచి ఎంపీగా లోక్‌సభకు ప్రాతినిథ్యం వహించారాయన. రెండోసారి ఎంపీ టిక్కెట్‌ దక్కించుకోవడంలో విఫలమై, ఎమ్మెల్యే టిక్కెట్‌తో సరిపెట్టుకుని.. ఎన్నికల ప్రచారంలో నానా తిప్పలూ పడ్డారు వరప్రసాద్‌. విద్యాధికుడైన వరప్రసాద్‌.. మాట తీరు విషయంలో కొంత భిన్నంగా కనిపిస్తుంటారు. చాలా సౌమ్యుడు కూడా.

అప్పట్లో జనసేనతో వరప్రసాద్‌కి సన్నిహిత సంబంధాలుండేవి.. ఆ కారణంగానే ఆయనపై పార్టీ కొంత ‘వేరే దృష్టి’ పెట్టిందనుకోండి.. అది వేరే సంగతి. ఇప్పుడాయన బీజేపీ వైపు చూస్తున్నారట.. అంటూ సొంత పార్టీ నేతలే ఎందుకు దుష్ప్రచారానికి తెరలేపినట్లు.? అన్నది ఇప్పుడు రాజకీయ వర్గాల్లో హాట్‌ టాపిక్‌గా మారింది.

‘నేనెందుకు పార్టీ మారతాను.? కళ్ళు పోతాయ్‌..’ అంటూ వరప్రసాద్‌, తాజాగా ఓ ఇంటర్వ్యూలో వ్యాఖ్యానించారు. కానీ, తెరవెనుకాల కథ గట్టిగానే నడుస్తోంది. ఆయన్ని పార్టీ నుంచి బయటకు పంపేందుకు నియోజకవర్గంలో వైసీపీ నేతలే కష్టపడుతున్నారు. ఈ వ్యవహారాన్ని క్యాష్‌ చేసుకోవడానికి టీడీపీ ప్రయత్నిస్తున్నా, ఆయన టీడీపీ వైపుకు వెళ్ళే పరిస్థితి లేదు. జనసేనలోకీ ఆయన వెళ్ళలేరు.. ఎందుకంటే, జనసేనలోకి వెళితే.. తనకు బలం సరిపోదన్నది ఆయన భయం. అదే బీజేపీలోకి వెళితే.. వైసీపీ నుంచి కొంత రక్షన వుంటుందని ఆయన భావిస్తున్నారట.

కానీ, వరప్రసాద్‌ మాత్రం ‘అంతా ఉత్తదే’ అని చెబుతున్నారు. ఇంతకీ ఏది నిజం.? వరప్రసాద్‌ లాంటి సౌమ్యుడ్ని పార్టీ అధిష్టానం అనుమతి లేకుండా, సొంత పార్టీ కార్యకర్తలు, నేతలే ఇబ్బంది పెట్టగలరా.? కాస్త ఆలోచించాల్సిన విషయమే ఇది.