రోజులు గడుస్తున్నాయ్.. తెలుగుదేశం పార్టీ అధినేత నారా చంద్రబాబుకి ఇంకా స్కిల్ డెవలప్మెంట్ స్కామ్ వ్యవహారంలోనే న్యాయస్థానం నుంచి ఊరట దక్కలేదు.! ఈలోగా మరికొన్ని కేసులు ఆయన కోసం ఎదురు చూస్తున్నాయ్.!
‘చంద్రబాబుని కుట్రపూరితంగా అరెస్టు చేశారు.. ఏపీ సీఐడీ ఆయన్ని విజయవాడకు తరలించేలోపు, ఈ కేసు నుంచి ఆయన బయటపడతారు..’ అని అప్పట్లో బలంగా చెప్పిన తెలుగు తమ్ముళ్ళు, జరుగుతున్న పరిణామాలపై ఎలా విశ్లేషించాలో అర్థం కాక జుట్టుపీక్కుంటున్నారు.
ఇదేమీ వేల కోట్ల స్కామ్ కాదని చిన్నగా మాట్లాడలేం. స్కామ్ అంటూ జరిగి వుంటే, లక్ష రూపాయలైనా, కోటి రూపాయలైనా.. వంద కోట్లైనా.. వెయ్యి కోట్లయినా.. ఒక్కటే. కానీ, మన దేశంలో వ్యవస్థలు, ఆయా కేసుల్ని సాగదీయడమనేదొకటి వుంది కదా.! సో, ఏళ్ళ తరబడి నిందితులుగానే వుంటారు తప్ప, దోషులుగా తేలడం కావొచ్చు.. క్లీన్ చిట్ రావడం కావొచ్చు అంత తేలిక కాదు.
క్రమంగా టీడీపీ క్యాడర్‌లో నిస్తేజం అలముకుంటోంది. రేపు ఈ కేసులో చంద్రబాబుకి ఊరట లభిస్తుందా.? లేదా.? అన్నదానిపై ఎటూ చెప్పలేకపోతున్నారు తెలుగు తమ్ముళ్ళు. ఇరు పక్షాల వాదనలూ విన్న న్యాయస్థానం, తీర్పుని రిజర్వ్ చేసిన సంగతి తెలిసిందే. ఆ తీర్పు చంద్రబాబుకి అనుకూలంగా వచ్చినా, ఆ వెంటనే ఆయన్ని అరెస్టు చేయడానికి ఏపీ సీఐడీ రెడీగా వుంది.. ఇందుకోసం ఫైబర్ నెట్ స్కామ్ వ్యవహారాన్ని తెరపైకి తెచ్చింది ఏపీ సీఐడీ.
ఆ ఫైబర్ నెట్ వ్యవహారంలోనూ చంద్రబాబు అరెస్టయితే.. ఆ కేసు కూడా ఇలాగే సాగుతూ సాగుతూ వుంటే.. ఆ తర్వాత మరో కేసు.. అదీ ఇలాగే సాగతీతకు గురైతే పరిస్థితి ఏంటి.? ఇదే ఇప్పుడు తెలుగు తమ్ముళ్ళ టెన్షన్. చంద్రబాబు లోపల వుంటే, లోకేష్ బయట వున్నా టీడీపీకి పెద్దగా ప్రయోజనం వుండదు.
ఒకవేళ నారా లోకేష్ కూడా అరెస్టయితే, తెలుగుదేశం పార్టీకి దిక్కెవరు.? ఎలాగోలా వ్యవస్థల్ని మేనేజ్ చేసుకుని, బయటకు వచ్చే పరిస్థితి టీడీపీ అధినేత చంద్రబాబుకి ఇప్పుడు లేదు. మరెలా.? అంతా అగమ్యగోచరం.! టీడీపీలో ఇప్పుడంతా ఒకటే చర్చ, చంద్రబాబు జైలు నుంచి బయటకు వచ్చే దారేదీ.? అనే.!