టీడీపీలో పేలనున్న ‘బుచ్చయ్య బాంబు’: బుజ్జగింపులు ఫలించేనా.?

టీడీపీ సీనియర్ నేత, ఎమ్మెల్యే గోరంట్ల బుచ్చయ్య చౌదరి, పార్టీ అధినాయకత్వంపై అసహనంతో ఊగిపోతున్నారు. ఈ నెల 25న ఎమ్మెల్యే పదవికి రాజీనామా చేయనున్నారట. అదే రోజు పార్టీకి సైతం రాజీనామా చేయబోతున్నారట. ఈ విషయాన్ని టీడీపీ అనుకూల మీడియాకి చెందిన ఓ ప్రముఖ మీడియా సంచలనాత్మకమైన రీతిలో ప్రొజెక్ట్ చేస్తోంది.

టీడీపీలో బాంబు పేల్చాలంటే సదరు టీడీపీ అనుకూల మీడియానే ఎప్పుడూ ముందు వరుసలో నిల్చుంటుంది. చిత్రమేంటంటే, సదరు టీడీపీ అనుకూల ఛానల్, పత్రిక.. ఎన్నాళ్ళుగానో టీడీపీని నాశనం చేసేందుకు ప్రయత్నిస్తున్నా, దాన్నే నమ్మకుని రాజకీయాల్లో ‘ముందుకు’ పోతున్నారు టీడీపీ అధినేత నారా చంద్రబాబునాయుడు.

ఇక, బుచ్చయ్య ఎందుకు అసహనం వ్యక్తం చేస్తున్నారు పార్టీ పైన.? అంటే, దానికీ పెద్ద పెద్ద కారణాలే వున్నాయట. చాలాకాలంగా బుచ్చయ్యకు పార్టీలో తగిన ప్రాధాన్యత లభించడంలేదు. టీడీపీలో అతి కొద్దిమంది అత్యంత సీనియర్ నాయకుల్లో ఆయనా ఒకరు. అయితే, ఆయన్ని కాదని ఆయన నియోజకవర్గంలో ఇతరుల పెత్తనం పెరిగిపోతోంది.. అదీ టీడీపీకి సంబంధించి.

అంతేనా, జిల్లా రాజకీయాల్లోనూ, రాజమండ్రి నగర రాజకీయాల్లోనూ టీడీపీకి చెందిన యువ నాయకత్వం అత్యుత్సాహం పెరిగిపోయిందట. ‘నాకు చాలా సమస్యలున్నాయి. పార్టీ అధిష్టానం నన్ను పట్టించుకోవడంలేదు..’ అంటూ గోరంట్ల బుచ్చయ్య చౌదరి వాపోతున్నారట. కాగా, మాజీ హోంమంత్రి నిమ్మకాయల చినరాజప్ప సహా పలువురు టీడీపీ ముఖ్య నేతలు, గోరంట్ల బుచ్చయ్య చౌదరితో ఈ రోజు చర్చలు జరిపారు. ‘టీ కప్పులో తుపాను మాత్రమే. పార్టీకి ఆయన పెద్ద దిక్కుగా వున్నారు.. ఆయన అనుభవం పార్టీకి అవసరం. ఆయనెందుకు పార్టీకి రాజీనామా చేస్తారు.?’ అంటూ నిమ్మకాయల చిన రాజప్ప వ్యాఖ్యానించడం గమనార్హం.

ఇదిలా వుంటే, చంద్రబాబు కూడా రంగంలోకి దిగి గోరంట్ల బుచ్చయ్య చౌదరిని బుజ్జగిస్తున్నారు. ఆ బుజ్జగింపులు ఫలిస్తాయా.? టీడీపీ నుంచి ఆయన్ను బయటకు పంపేందుకు టీడీపీ అనుకూల మీడియాకి చెందిన ఓ ఛానల్ చేస్తున్న ప్రయత్నాలు ఏమవుతాయి.? వేచి చూడాల్సిందే.