జస్ట్ ఆస్కింగ్: బీజేపీ ఎంతమందిని అనర్హుల్ని చేసింది.?

టీడీపీ నుంచి రాజ్యసభకు ప్రాతినిథ్యం వహిస్తున్న నలుగురు ఎంపీల్ని, బీజేపీ లోకి లాక్కున్న భారతీయ జనతా పార్టీ.. మరో అంశానికి సంబంధించి ‘అనర్హత వేటు’ అనే వాదనను తెరపైకి తెచ్చింది. పైగా, ఇది తిరుపతి ఉప ఎన్నిక నేపథ్యంలో జరుగుతున్న చర్చ కావడం మరింత ఆసక్తికరం. అందునా, క్రైస్తవంలోకి మారిన దళితుల వ్యవహారంపై బీజేపీ సీనియర్ నేత సునీల్ దేవధర్ గత కొద్ది కాలంగా తీవ్రస్థాయిలో వ్యాఖ్యలు చేస్తున్నారు.

ఆయన తాజాగా మరో ముందడుగు వేసి, ‘అంబేద్కర్ క్రైస్తవ మతంలోకి మారటానికి పూర్తిగా వ్యతిరేకం. రాజ్యాంగం ప్రకారం ఒకసారి ఎస్సీ మతం మారితే, వారికున్న ప్రయోజనలన్నంటినీ కోల్పోతారు. ఎస్సీలకు కేటాయించిన సీట్లలో, క్రిస్టియన్లను పోటీ చేయించడం ద్వారా ముఖ్యమంత్రి వైఎస్ జగన్ ఎస్సీలకు ద్రోహం చేస్తున్నారు. మేము వారిని చట్ట ప్రకారం అనర్హులను చేస్తాము..’ అంటూ వ్యాఖ్యానించారు.

ఈ వ్యాఖ్యల్ని బీజేపీ తమ అధికార సోషల్ మీడియా హ్యాండిల్ ద్వారా పోస్ట్ చేసింది. అంతా బాగానే వుందిగానీ, ’మీ విషయంలో ఏమవుతుంది గురుమూర్తి.?’ అని సునీల్ దేవధర్ ప్రశ్నించడమే మరింత ఆశ్చర్యకరం. వైసీపీ అభ్యర్థి గురుమూర్తిని టార్గెట్ చేసిన సునీల్ దేవధర్ సంధిస్తున్న ప్రశ్నాస్త్రమిది.

కానీ, గురుమూర్తి ఇప్పటికే తాను హిందువునని ప్రకటించారు, అందుకు తగ్గ ఆధారాలు చూపారు. గురుమూర్తి విషయాన్ని పక్కన పెడితే, ఏపీ హోంమంత్రి మేకతోటి సుచరిత విషయంలోనూ బీజేపీ ఇలాంటి ఆరోపణలే గత కొంతకాలంగా చేస్తోంది. ‘చట్టప్రకారం అనర్హులను చేస్తాము’ అని చెబుతున్న బీజేపీ, మేకతోటి సుచరితపై ఎందుకు చర్యలు తీసుకోలేకపోతోంది.? అన్నది ఆసక్తికరం ఇక్కడ. వైసీపీ రెబల్ ఎంపీ రఘురామకృష్ణరాజు గతంలో ఓ సందర్భంలో మాట్లాడుతూ, రాష్ట్రంలో ఎవరూ ఊహించని రీతిలో మత మార్పిడులు జరిగాయనీ, అవి ఇంకా జరుగుతున్నాయనీ, ప్రస్తుతం రాష్ట్రంలో క్రిస్టియన్ల జనాభా 25 శాతం దాటేసి, 50 శాతం దిశగా పరుగులు పెడుతోందనీ ఆరోపించారు.

మరి, ఈ అంశాలపై బీజేపీ స్టాండ్ ఏమిటి.? తిరుపతి ఉప ఎన్నిక వేళ ఈ అంశాలపై బీజేపీ స్పష్టత ఇవ్వాలి. కేంద్రంలో అధికారంలో వున్న బీజేపీ, మతం మార్చుకున్న వ్యక్తులకు వారికి తమ మాజీ మతాల ద్వారా అందే రిజర్వేషన్ల ఫలాలు అందనీయకుండా చేయడంలో ఎంత చిత్తశుద్ధిని ప్రదర్శించింది.? ప్రదర్శించబోతోంది.? ఏమో, కమలనాథులకే తెలియాలి.