ముగిసిన సీఎం జగన్ ఢిల్లీ టూర్: ఇంతకీ ఏం సాధించినట్టు.?

ఆంధ్రపదేశ్ ముఖ్యమంత్రి వైఎస్ జగన్ మోహన్ రెడ్డి ఢిల్లీ పర్యటన ముగిసింది. కేంద్ర హోం శాఖ మంత్రి అమిత్ షా, నీతి అయోగ్ వైస్ ఛైర్మన్ రాజీవ్ కుమార్ తదితరులతో ముఖ్యమంత్రి వైఎస్ జగన్ విడివిడిగా భేటీలు నిర్వహించారు. ధర్మేంద్ర ప్రధాన్, పీయూష్ గోయెల్, గజేంద్ర షెకావత్, ప్రకాష్ జవదేకర్ తదితర కేంద్ర మంత్రులతోనూ వైఎస్ జగన్ భేటీ అయ్యారు. రాష్ట్రానికి సంబంధించి పలు కీలక అంశాలపై వైఎస్ జగన్, కేంద్ర మంత్రులతో చర్చించినట్లు అధికార పార్టీ చెబుతోంది. ముఖ్యమంత్రి ఢిల్లీకి వెళ్ళడం, రాష్ట్రానికి సంబంధించి పలు అంశాలపై కేంద్ర ప్రభుత్వ పెద్దలతో చర్చలు జరపడం అనేది సర్వసాధారణమైన వ్యవహారమే. వినతులు, విజ్నప్తులు.. ఇవన్నీ మామూలే.

ఇంతకీ, రాష్ట్ర ముఖ్యమంత్రి ఢిల్లీ పర్యటనతో రాష్ట్రానికి ఒరిగేదేంటి.? అన్నదే కీలకం ఇక్కడ. రాష్ట్ర అభివృద్ధి కోసం కాదు, తనను ఇరకాటంలో పడేస్తున్న సొంత పార్టీకి చెందిన రెబల్ ఎంపీ రఘురామకృష్ణరాజు విషయంలో తల బొప్పికట్టి, ఆ తలనొప్పిని తగ్గించుకునేందుకు కేంద్రం వద్ద సాగిలా పడేందుకు వైఎస్ జగన్ ఢిల్లీకి వెళ్ళారంటూ విపక్షాలు.. మరీ ముఖ్యంగా ప్రధాన ప్రతిపక్షం తెలుగుదేశం పార్టీ విమర్శిస్తోన్న విషయం విదితమే.

తూచ్, విపక్షాలు చెప్పేది అసత్యం.. అని చెప్పుకోవాలంటే, అధికార పార్టీ.. ముఖ్యమంత్రి ఢిల్లీ పర్యటనతో ఏం సాధించారో వెల్లడించగలగాలి. కేంద్ర మంత్రుల్ని వైఎస్ జగన్ కలిశారు సరే, వారి నుంచి ఏం హామీలు రాష్ట్రానికి దక్కినట్లు.? పాచిందే పాటరా పాచిపళ్ళ డాష్ డాష్.. అన్నట్టు, పాత కథే మళ్ళీ చెప్పుకోవాలి. ప్రత్యేక హోదా, పోలవరం ప్రాజెక్టు, దుగరాజపట్నం పోర్టు, కడప ఉక్కు పరిశ్రమ, విశాఖ రైల్వే జోన్, రాజధాని.. ఇలా విభజన హామీల్లో చాలా వ్యవహారాలున్నాయి. వాటిల్లో ఏ ఒక్కదాని విషయంలో అయినా కేంద్ర ప్రభుత్వ పెద్దలు, ముఖ్యమంత్రికి హామీ ఇచ్చారా.? ఇచ్చి వుంటే.. అది ఘనంగా మీడియా ముందుకొచ్చి చెప్పి వుండేవారే కదా.?

అయిననూ పోయి రావలె హస్తినకు.. అన్న చందాన ప్రతిసారీ రాష్ట్ర ముఖ్యమంత్రి ఢిల్లీ పర్యటన వుంటోంది తప్ప.. ఆ పర్యటనకు తగిన గౌరవం కేంద్రం ఎందుకు ఇవ్వడంలేదు.? అన్నదే మిలియన్ డాలర్ల ప్రశ్న.