రఘురామని కొట్టారా.? లేదా.? ఆర్మీ ఆసుపత్రిలో ఏం తేలుతుంది.?

హైద్రాబాద్ నుంచి వైసీపీ రెబల్ ఎంపీ రఘురామకృష్ణరాజుని అరెస్ట్ చేసి గుంటూరుకి తరలించిన ఏపీ సీఐడీ, సుప్రీంకోర్టు ఆదేశాల నేపథ్యంలో తిరిగి హైద్రాబాద్ తరలించాల్సి వుంది. సికింద్రాబాద్ ఆర్మీ ఆసుపత్రిలో ఆయనకు వైద్య పరీక్షలు జరగనున్న విషయం విదితమే. అయితే, ఈలోగా ఏపీ సీఐడీ, సుప్రీంకోర్టుకి ప్రత్యేకంగా ఏమైనా విన్నవించుకునే అవకాశం వుందా.? అన్నదానిపై భిన్న వాదనలు వినిపిస్తున్నాయి.

లేదూ, సుప్రీం ఆదేశాలే అమలైతే, తెలంగాణ హైకోర్టు నియమించే జ్యుడీషియల్ అధికారి సమక్షంలో వైద్య పరీక్షలు జరుగుతాయి. ఇంతకీ, ఆ వైద్య పరీక్షల్లో ఏం తేలనుంది.? గుంటూరు ప్రభుత్వాసుపత్రి వైద్యులు, రఘురామకృష్ణరాజుని పోలీసులు కొట్టారనడానికి ఎలాంటి ఆధారాల్లేవని చెబుతున్నారు. కాళ్ళు వాచి, ఎర్రగా అయినంతమాత్రాన అవి ఎవరో కొట్టిన దెబ్బలని చెప్పలేం.. అన్నది గుంటూరు ప్రభుత్వాసుపత్రి ఇచ్చిన నివేదిక. హార్ట్, కిడ్నీలు.. ఇలా ప్రధాన శరీర అంతర్గత అవయవాలన్నీ సరిగ్గానే పనిచేస్తున్నట్లు కూడా ఆ నివేదికలో స్పష్టం చేశారు.

కానీ, రఘురామ తరఫు న్యాయవాదుల వాదన ఇంకోలా వుంది. ఏపీ సీఐడీ, రాష్ట్ర ప్రభుత్వం అంత ధీమాతో సుప్రీంకోర్టులో వాదనలు వినిపించినా, ఆర్మీ ఆసుపత్రిలో వైద్య పరీక్షల కోసం సుప్రీంకోర్టు ఎందుకు ఆదేశాలు ఇచ్చిందన్నదే ఇక్కడ అత్యంత ఆసక్తికరమైన అంశం. మామూలుగా అయితే, వైద్య పరీక్షల ఫలితాలు ఎక్కడైనా ఒకేలా వుండాలి. కానీ, ఇది దిక్కుమాలిన రాజకీయాల కాలం. ప్రైవేటు ఆసుపత్రుల్లో ఒకలా, ప్రభుత్వ ఆసుపత్రుల్లో ఇంకోలా నివేదికలు వుంటున్నాయి.

పైగా, గుంటూరు ప్రభుత్వాసుపత్రి సూపరింటెండెంట్ మీద కూడా రాజకీయ ఆరోపణలు వస్తున్నాయిప్పుడు. దాంతో, సికింద్రాబాద్ ఆర్మీ ఆసుపత్రి ఇవ్వబోయే వైద్య నివేదిక అత్యంత కీలకం కాబోతోంది. అది తమ వాదనలకు బలాన్నిస్తుందని ఇరు వర్గాలూ పైకి గంభీరంగా చెబుతున్నాయి. చూద్దాం.. ఏం జరుగుతుందో.ఏం తేలుతుందో.!