ఆ ‘గొట్టం’లో బూతుపై, బూతు మీడియా నీతులు.!

సినిమాల్లో బూతు సన్నివేశాలు చూపిస్తే తప్పు లేదుగానీ, ఆ బూతు గురించి సోషల్ మీడియాలో ఇంకా పచ్చి బూతుగా చర్చించుకుంటే తప్పొచ్చి పడింది. పైగా, బూతు మీడియా.. బూతుల గురించి నీతులు చెబుతోంటే, నవ్వాలో ఏడవాలో తెలియని పరిస్థితి.

అసలు తెలుగు మీడియా ఎప్పుడో సిగ్గొదిలేసిందంటారు చాలామంది. అందులో నిజం లేకపోలేదు. న్యూస్ ఛానళ్ళ హోరులో, బూతు సర్వసాధారణమైపోయింది. ఓ బూతు మాటని పదే పదే రిపీట్ చేస్తూ, దానికి అర్థాలు వెతుకుతూ ప్రస్తుతం న్యూస్ ఛానళ్ళలో నడుస్తున్న నాన్సెన్స్ గురించి ఎంత చెప్పుకున్నా తక్కువే.

సినీ నటి సమంత వ్యక్తిగత జీవితానికి సంబంధించి సోషల్ మీడియాలో ఒకింత జుగుప్సాకరమైన రీతిలోనే రచ్చ జరుగుతోంది. నిజానికి, ఇది సమంతతో మొదలవలేదు.. సమంతతో ఆగిపోదు కూడా. రకుల్ ప్రీత్ సింగ్, కాజల్ అగర్వాల్.. ఇలా చాలామంది బాధితులున్నారు. ఆయా సందర్భాల్లో ఆయా సెలబ్రిటీలు తమపై జరుగుతున్న ఈ బూతు ప్రచారంపై పోలీసుల్ని ఆశ్రయిస్తున్న వైనం కూడా చూస్తున్నాం.

అనసూయ లాంటోళ్ళయితే తరచూ సోషల్ మీడియాలో తమపై జరిగే ‘దాడి’ని ఖండిస్తూ, పోలీసులకు ఫిర్యాదు చేస్తూ వస్తుంటారు. కానీ, ఏం లాభం.? సోషల్ మీడియాని ఎవరూ కంట్రోల్ చేయలేని పరిస్థితి. అరెస్టులు జరుగుతాయ్.. కానీ, ఎంతమందిని అరెస్ట్ చేయగలరు.? ఇదే సో కాల్డ్ నెటిజన్ల ధీమా కావొచ్చు.

యూ ట్యూబ్ ఛానళ్ళు పెరిగిపోయాక.. సెలబ్రిటీల ఇంటర్వ్యూలు కుప్పలు తెప్పలుగా కనిపిస్తున్నాయ్. రొటీన్ ఇంటర్వ్యూలకు కిక్ వుండదు గనుక, సెలబ్రిటీలూ కావాల్సినంత స్టఫ్ ఇస్తున్నారు. వాళ్ళు ఇచ్చే స్టఫ్‌కి కొంత అదనపు మసాలా జోడించడం మామూలే.

ఇప్పుడు ఆ థంబ్ నెయిల్స్ మీద పోరాటం నడుస్తోంది. దీనిపై మళ్ళీ న్యూస్ చానళ్ళలో చర్చ పేరుతో న్యూసెన్స్. అసలంటూ రాజకీయ బూతుని న్యూస్ ఛానళ్ళు సెన్సార్ చేసి, ఆ తర్వాత యూ ట్యూబ్ ఛానళ్ళకు పాటాలు చెబితే బావుంటుందేమో.