దుబ్బాక టు తిరుపతి.. వయా జీహెచ్‌ఎంసీ.!

దుబ్బాక ఉప ఎన్నికలో బీజేపీ గెలుస్తుందని ఎవరైనా ఊహించారా.? గ్రేటర్‌ హైద్రాబాద్‌ ఎన్నికల్లో టీఆర్‌ఎస్‌కి బీజేపీ గట్టి పోటీ ఇవ్వగలదని ఎవరైనా అంచనా వేశారా.? అసలు పొలిటికల్‌ ఈక్వేషన్స్‌ ఎలా మారుతున్నాయో అర్థం కాని పరిస్థితి. అటు దుబ్బాక ఉప ఎన్నిక సమయంలోనూ, ఇటు గ్రేటర్‌ హైద్రాబాద్‌ ఎన్నికల సమయంలోనూ మారిన ఈక్వేషన్స్‌ ఇప్పటికీ రాజకీయ విశ్లేషకులకు మింగుడుపడ్డంలేదు. అక్కడా ఇక్కడా ఎగ్జిట్‌ పోల్‌ అంచనాలు తారుమారయ్యాయి. అసలేం జరుగుతోంది.? బీజేపీ ఎలా ఓటర్లను తనవైపుకు తిప్పుకోగలుగుతోంది.? ఇదే ఇప్పుడు మిలియన్‌ డాలర్ల ప్రశ్నగా మారింది.

నిజానికి, తిరుపతి ఉప ఎన్నిక గురించి చర్చించుకోవాలంటే భారతీయ జనతా పార్టీకి అంత సీన్‌ లేదు. ఆ పార్టీకి డిపాజిట్‌ కూడా రావడం కష్టమే ఇప్పుడున్న పరిస్థితుల్లో. జనసేన పార్టీదీ ఇందుకు భిన్నమైన పరిస్థితి ఏమీ కాదుగానీ, బీజేపీతో పోల్చుకుంటే కాస్త బెటర్‌. ఈ రెండు పార్టీలూ కలిసి పోటీ చేసినా, అక్కడ రెండో స్థానంలోకి వచ్చే టీడీపీతో పోటీ పడటం కూడా కష్టం. ఇది సాధారణ విశ్లేషణ.

రాయలసీమలో వైఎస్సార్‌ కాంగ్రెస్‌ పార్టీకి తిరుగులేని బలం వుంది. పైగా, తిరుపతి సిట్టింగ్‌ సీటు వైసీపీదే. ఆ లెక్కన, చాలా తేలిగ్గానే తిరుపతి ఉప ఎన్నికను వైఎస్సార్సీపీ గెల్చుకోవచ్చు. కానీ, ఈసారి మాత్రం రాజకీయ విశ్లేషకులు ఆచి తూచి విశ్లేషిస్తున్నారు తిరుపతి ఉప ఎన్నికకు సంబంధించిన ప్రస్తావనకు వస్తే. దుబ్బాక మొదటి ప్రమాద హెచ్చరిక.. జీహెచ్‌ఎంసీ రెండో ప్రమాద హెచ్చరిక.. తిరుపతిలో మాత్రం బీజేపీ తుపానులో వైసీపీ కొట్టుకుపోవడం ఖాయం.. అన్నది తాజాగా రాజకీయ వర్గాల్లో జరుగుతోన్న చర్చల సారాంశం.

ముందే చెప్పుకున్నాం కదా.. మామూలుగా అయితే, బీజేపీ.. తిరుపతిలో సత్తా చాటడం అనేది అసాధ్యం. కానీ, ఇప్పుడు ఈక్వేషన్స్‌ మారిపోయాయ్‌. అసలు బీజేపీ ఎలా పోల్‌ మేనేజ్‌మెంట్‌ చేస్తోందో కూడా ఎవరికీ అంతుబట్టడంలేదు. గ్రేటర్‌ హైద్రాబాద్‌కి సంబంధించినంతవరకు చూసుకుంటే, నార్త్‌ ఇండియన్స్‌ని బాగా తనవైపుకు తిప్పుకోగలిగింది బీజేపీ. హిందుత్వాన్ని రగిల్చింది.. అన్నిటికీ మించి ‘సర్జికల్‌ స్ట్రైక్స్‌’ అనే మాట అంచనాలకు భిన్నంగా వర్కవుట్‌ అయ్యిందనే చెప్పాలి. దుబ్బాకలో ఓ అస్త్రం… జీహెచ్‌ఎంసీలో మరిన్ని అస్త్రాలు.. మరి, తిరుపతిలో బీజేపీ అస్త్రాలు ఏంటి.? ఇదైతే ప్రస్తుతానికి సస్పెన్సే. ఒక్కటి మాత్రం నిజం.. వైసీపీకి, తిరుపతి ఉప ఎన్నిక అంత ఆషామాషీ వ్యవహారం కాదు.