కోడెల ఇంట్లో దొంగతనం: ఎవరా దొంగలు.?

ఏపీ అసెంబ్లీ మాజీ స్పీకర్‌, టీడీపీ సీనియర్‌ నేత కోడెల శివప్రసాద్‌ మరోసారి వార్తల్లోకెక్కారు. ఈసారి కోడెల ఇంట్లో కంప్యూటర్ల దొంగతనం వ్యవహారం కలకలం రేపుతోంది. ఇంట్లోనే అంటే, ఆయన కార్యాలయంలో అన్నమాట. కంప్యూటర్లను గుర్తు తెలియని వ్యక్తులు అర్థరాత్రి దొంగిలించారట. సీసీటీవీ ఫుటేజ్‌ అందుబాటులో లేదట. వాచ్‌మెన్‌ని కొట్టి, కంప్యూటర్లను దొంగలు ఎత్తుకెళ్ళారన్నది ప్రాథమికంగా అందుతోన్న సమాచారం.

ఆ కంప్యూటర్లలో ఏముందన్నది ఇప్పుడు రాజకీయ వర్గాల్లో చర్చనీయాంశంగా మారింది. ఆ ఇంటికి సమీపంలోనే మానిటర్లను పడేసి నిందుతులు పరారయ్యారంటూ ఇంకో వెర్షన్‌ విన్పిస్తోంది. కోడెల శివప్రసాద్‌ ఈ వ్యవహారంపై పోలీసులకు ఫిర్యాదు చేయడంతో, పోలీసులు రంగంలోకి దిగి విచారణ షురూ చేశారు.

మరోపక్క, ఇదంతా పక్కా ప్లాన్‌తో కోడెల శివప్రసాద్‌ స్వయంగా ఆడిస్తున్న నాటకం అన్న వాదనలు అధికార పక్షం వైఎస్సార్‌ కాంగ్రెస్‌ పార్టీ నుంచి వ్యక్తమవుతన్నాయి. ఆంధ్రప్రదేశ్‌ అసెంబ్లీ హైద్రాబాద్‌ నుంచి అమరావతికి తరలి వెళ్ళే క్రమంలో కొంత ఫర్నిచర్‌ని కోడెల శివప్రసాద్‌ తన క్యాంపు కార్యాలయానికి తరలించిన వ్యవహారం పెను దుమారం రేపుతున్న విషయం విదితమే. ఈ వ్యవహారాన్ని అధికార పార్టీకి చెందిన ముఖ్య నేతలు, అందునా మంత్రులు సైతం ‘దొంగతనం’గా అభివర్నిస్తున్నారు.

ఆ వివాదం నుంచి ఎలా బయటపడాలో తెలియక కోడెల శివప్రసాద్‌ నానా పాట్లూ పడుతున్న సంగతి తెల్సిందే. సరిగ్గా ఈ టైమ్‌లోనే కోడెల ఇంట్లో దొంగతనం వ్యవహారం వెలుగు చూసింది. సో.. ఇది కోడెల శివప్రసాద్‌ స్వయంగా ఆడిస్తున్న నాటకం అయి వుండాలి.. లేదంటే, అధికార పార్టీ కుట్ర పూరితంగా ఈ దొంగతనానికి తెరలేపి వుండాలన్నది సర్వత్రా వ్యక్తమవుతోన్న అభిప్రాయం. నిజానికి కోడెలకు వివాదాలు కొత్తేమీ కాదు.!