ప్రత్యేక హోదాపై కేంద్రాన్ని వైసీపీ, టీడీపీ నిలదీసేస్తాయా.?

‘ప్రత్యేక హోదా అంశాన్ని పార్లమెంటు సమావేశాల్లో లేవనెత్తుతాం..’ అంటూ ఇటు అధికార వైఎస్సార్ కాంగ్రెస్ పార్టీ, అటు ప్రతిపక్షం తెలుగుదేశం పార్టీ చాలా ధీమాగా చెప్పేస్తున్నాయ్. ‘ఓసోస్.. గతంలో భలేగా కేంద్రాన్ని నిలదీసేశారు, ఇప్పుడు మళ్ళీ ప్రశ్నించేస్తారు..’ అంటూ టీడీపీ, వైసీపీల మీద సాధారణ ప్రజానీకం సోషల్ మీడియా వేదికగా సెటైర్లు వేసేస్తున్నారు.

పోలవరం ప్రాజెక్టుకి కేంద్రం ఇవ్వాల్సిన నిధులు సహా చాలా అంశాలపై కేంద్రాన్ని పార్లమెంటు సాక్షిగా ప్రశ్నిస్తామన్నది వైసీపీ చెబుతున్న మాట. ఇక, రాష్ట్రంలో అరాచక పాలన సహా, రాష్ట్రానికి సంబంధించిన కీలక అంశాలపై పార్లమెంటులో చర్చ లేవనెత్తుతామని టీడీపీ నేతలు చెబుతున్నారు. పార్లమెంటులో టీడీపీతో పోల్చితే వైసీపీకే బలమెక్కువ. 22 మంది ఎంపీలున్నారు లోక్ సభలో వైసీపికి. టీడీపీ బలం ముగ్గురు ఎంపీలు మాత్రమే. రాజ్యసభ సంగతి వేరే.

లోక్‌సభ విషయానికొస్తే, ఏపీ ఎంపీల గొంతు ఎలా నొక్కెయ్యాలో జాతీయ పార్టీలకు బాగా తెలుసు. గతంలో చాలా సందర్భాల్లో ఏపీ ఎంపీలకు ఉమ్మడిగా పార్లమెంటు సాక్షిగా పరాభవం ఎదురయ్యింది. ఇక, ఈసారి పార్లమెంటు సమావేశాల్లో కొత్త వ్యవసాయ చట్టాల అంశం, ఆ చట్టాల చుట్టూ ఢిల్లీ వేదికగా జరిగిన ఉద్యమం, ఉద్రిక్త పరిస్థతులు.. వంటివి వాతావరణాన్ని వేడెక్కించేయనున్నాయి. ఈ విషయంలో వైసీపీ, టీడీపీ ఇప్పటికే రివర్స్ గేర్ వేసేశాయి.

గతంలో ఈ చట్టాలకు టీడీపీ, వైసీపీ మద్దతిచ్చిన సంగతి తెలిసిందే. దాంతో, వ్యవసాయ చట్టాల అంశానికొచ్చేసరికి టీడీపీ, వైసీపీ ఎంపీల నోరు పెగిలేందుకు ఆస్కారమే లేదు. పోలవరం ప్రాజెక్టు విషయానికొస్తే.. పనులు శరవేగంగా జరుగుతున్నాయని వైఎస్ జగన్ ప్రభుత్వం చెబుతోంది. జరగాల్సిన వేగంతో పోలవరం ప్రాజెక్టు పనులు జరగడంలేదని పోలవరం ప్రాజెక్టు అథారిటీ ఇటీవల వ్యాఖ్యానించినట్లు వార్తలొచ్చాయి. నిజానికి, కేంద్రం పోలవరం ప్రాజెక్టుకి ఇవ్వాల్సిన స్థాయిలో నిధులు ఇవ్వకపోయినా, గత చంద్రబాబు ప్రభుత్వం.. ప్రస్తుత వైఎస్ జగన్ ప్రభుత్వం నిలదీయలేకపోయాయి. రెండు పార్టీలూ గల్లీలో పులి, ఢిల్లీకి వెళితే పిల్లి.. అన్నట్టు వ్యవహరిస్తాయి తప్ప, రాష్ట్ర ప్రయోజనాల కోసం చిత్తశుద్ధితో వ్యవహరిస్తాయని ఎలా అనుకోగలం.?