సింహాచలము.. మహా వివాదాలమయము..

సింహాచలము.. మహాపుణ్యక్షేత్రము.. అనే పసందైన పాటను ఇప్పుడిలా పాడుకోవాల్సిన పరిస్థితి కనిపిస్తోంది. ఆలయ చైర్ పర్సన్ గా సంచయిత నియామకం జరిగిన తర్వాత విదాదాస్పద అంశాలతోనే ఈ ఆలయం వార్తల్లోకి వస్తోంది. సంప్రదాయాలకు విరుద్ధంగా మన్సాస్ ట్రస్టు చైర్ పర్సన్ గా మహిళను నియమించడమే తప్పని అశోక్ గజపతిరాజు తదితరులు వాదిస్తున్నా.. సర్కారు మాత్రం పట్టించుకోలేదు.

ఆమె నియామకమే నిబంధనలకు విరుద్ధమని విపక్షాలు ఆరోపిస్తుండగా.. ఆలయ చరిత్రలో ఎన్నడూ లేనివిధంగా ఓ మహిళ.. స్వామివారి నిజరూప దర్శనం చేసుకోవడం మరింత వివాదాస్పదమైంది. ఇదంతా సంప్రదాయాలకు విరుద్ధమని చెబుతున్నా.. సంచయిత అస్సలు పట్టించుకోవడంలేదు. పైగా ఇష్టారీతిన నిర్ణయాలు తీసుకుంటున్నారనే ఆరోపణలూ వస్తున్నాయి.

ఇప్పటివరకు సంప్రదాయాల విషయంలో వివాదాలు రాగా.. తాజాగా ఆలయ నిర్వహణ విషయంలోనూ ఆరోపణలు గుప్పుమంటున్నాయి. ఆలయాన్ని ఓ ప్రైవేటు వ్యక్తికి అప్పగించేశారని విమర్శలు వస్తున్నాయి. సంచయిత ఎలాంటి పదవీ లేని ఓ వ్యక్తిని తీసుకొచ్చి సింహాచలం కొండ మీద పెట్టారని.. ఆలయ వ్యవహారాలు మొత్తం సదరు వ్యక్తే చూస్తున్నాడని చెబుతున్నారు.

కార్తీక్ సుందర రాజన్ అనే వ్యక్తి సంచయిత వ్యక్తిగత కార్యదర్శిగా దేవస్థానానికి చెందిన ఏసీ కాటేజీలో గత మూడు నెలల నుంచి తిష్ట వేసుకుని కూర్చున్నాడని.. ఆలయానికి సంబంధించిన రికార్డులన్నీ చూస్తున్నాడని చెబుతున్నారు. ఆలయ వాహనంతోపాటు సిబ్బందిని సైతం అతడి సేవల కోసం వినియోగిస్తున్నారని.. సంచయిత ఆదేశాలతో ఇవన్నీ జరుగుతున్నాయని సమాచారం.

ప్రభుత్వానికి సంబంధించని వ్యక్తికి ఇలా ఆలయ సొమ్ముతో రాచమర్యాదలు చేయించడంపై విమర్శలు వెల్లువెత్తుతున్నాయి. సంచయిత బాధ్యతలు స్వీకరించినప్పటి నుంచి అన్నీ వివాదాలే అవుతున్నాయి. మన్సాస్ ట్రస్టుకు ఉన్న వేల ఎకరాల భూములను కాజేయడానికే ఆమెకు పగ్గాలు అప్పగించారని ఇప్పటికే విపక్షాలు తీవ్రంగా మండిపడుతున్నాయి.

ప్రస్తుతం కొండ మీద ఓ ప్రైవేటు వ్యక్తిని కూర్చోబెట్టి ఆలయ రికార్డులన్నీ పరిశీలింపజేయడం ఇందులో భాగమేనని ఆరోపిస్తున్నాయి. ఆలయంలో జరుగుతున్న వ్యవహారాలన్నీ చూసి ఈవోగా ఉన్న బ్రమరాంబ సర్కారుకు లేఖ రాసి బదిలీ చేయించుకున్నారు.

మరోవైపు అశోక్ గజపతిరాజును మన్సాస్ ట్రస్టు చైర్మన్ పదవి నుంచి తొలగించడం నిబంధనలకు విరుద్ధమని వైసీపీ ఎంపీ రఘురామ కృష్ణంరాజు తాజాగా మండిపడ్డారు. రాష్ట్రంలో ఎలాంటి మచ్చా లేని రాజకీయ నాయకుడు ఎవరైనా ఉన్నారా అంటే అది అశోక్ గజపతి రాజేనని.. అలాంటి వ్యక్తిని అలా పదవి నుంచి తొలగించడం సమంజసం కాదన్నారు. ఆడ, మగ సమానమే అయినా.. ఇది మాత్రం సంప్రదాయాలకు సంబంధించిన విషయమని పేర్కొన్నారు. మరి ఈ వివాదాలకు ప్రభుత్వం చెక్ పెడుతుందా అన్నది చూడాలి.