‘కల్పిత’ కథ.. ఆర్జీవీ అంతులేని వ్యధ.!

ఒకప్పుడు సంచలనాలకు మారు పేరైన రామ్ గోపాల్‌ వర్మ.. ‘ఇప్పుడు సంచనాల కోసం ఏ స్థాయికైనా దిగజారడానికి వెనుకాడ్డంలేదు’ అనే విమర్శల్ని ఎదుర్కొంటున్నారు. ఆర్జీవీని ఇప్పటికీ అభిమానిస్తోన్న చాలామంది జీర్ణించుకోలేని విషయమిది. ‘అంతా నా ఇష్టం.. నేనెవరికీ భయపడను..’ అని చెప్పుకునే వర్మ, ఈ క్రమంలో చాలా ‘డైనమిక్‌’గా కన్పించేందుకు ప్రయత్నిస్తుంటారుగానీ, డొల్లతనం మాత్రం ఇట్టే బయటపడిపోతోంది. తెలుగు రాష్ట్రాల్లో సంచలనం సృష్టించిన ‘ప్రణయ్‌ హత్య’ ఘటనపై సినిమా తీస్తానని గతంలో ప్రకటించిన వర్మ, ఆ పనిలో ఇప్పటికే కొంత ముందడుగు వేశాడు.

కానీ, విషయం ముదిరి పాకాన పడ్డంతో, ‘అబ్బే, అది కల్పిత కథ..’ అంటున్నాడు. ‘మర్డర్‌’ పేరుతో వర్మ తీస్తోన్న సినిమా కథకి మూలం ‘ప్రణయ్‌ హత్య’. ప్రణయ్‌ భార్య అమృత, అమృత తండ్రి మారుతీరావులను పోలిన పాత్రలతో ఇప్పటికే పోస్టర్స్‌ విడుదల చేశాడు వర్మ. ఇప్పుడేమో, అసలు ఆ ఘటనకీ, తన సినిమాకీ సంబంధమే లేదని తేల్చేశాడు. ఇది ఒక్క ‘మర్డర్‌’ సినిమా విషయంలోనే కాదు, ఇటీవలి చాలా సినిమాల విషయంలో జరుగుతోంది.. అదీ వర్మ తీస్తోన్న సినిమాల విషయంలోనే కావడం గమనార్హం.

‘పవర్‌ స్టార్‌’ పేరుతో సినిమా అనౌన్స్‌ చేసి, అందులో పవన్‌ కళ్యాణ్‌ని పోలిన వ్యక్తిని పెట్టి, ‘తూచ్‌.. పవన్‌ కళ్యాణ్‌తో సంబంధం లేదు..’ అనడాన్ని ఏమనుకోవాలి.? ‘నేను చాలా తెలివైనోడ్ని..’ అని వర్మ అనుకోవచ్చుగాక. కానీ, ఇక్కడే ఆయన తన తెలివితక్కువతనాన్ని బయటపెట్టుకుంటున్నారు. ఒకప్పుడు వర్మ ఏం చేసినా సంచలనమే.. కానీ, ఇప్పుడు ఏది సంచలనంగా మారుతుందో.. దాని చుట్టూ వర్మ ఆలోచనలు పరిగెడుతున్నాయి. ప్రణయ్‌ హత్య నేపథ్యంలో సినిమా తెరకెక్కిస్తున్నప్పుడు ధైర్యముంటే అది ‘వాస్తవ గాధ’ అని చెప్పగలగాలి. కానీ, అంత ధైర్యం వర్మకెక్కడిది.?

‘లక్ష్మీస్‌ ఎన్టీఆర్‌’ సినిమా విషయంలోనూ వర్మ చేసిందదే. ‘కమ్మ రాజ్యంలో కడప రెడ్లు’ అని టైటిల్‌ పెట్టి, ఆనక టైటిల్‌ మార్చి.. వర్మ చేసిందీ అదే పబ్లిసిటీ స్టంటు. ఈ పబ్లిసిటీ స్టంట్స్‌తో సినిమాలో ‘మేటర్‌’ లేకపోయినా డబ్బులొచ్చేస్తున్నాయ్‌.. అనుకుంటే, అంతకన్నా హాస్యాస్పదం ఇంకేముంటుంది.? ‘ఆర్జీవీ కల్పిత కథ.. ఇది ఆర్జీవీ అంతులేని వ్యధ..’ అంటూ సోషల్‌ మీడియా వేదికగా నెటిజన్లు సెటైర్ల మీద సెటైర్లు దంచేస్తున్నారు.