అధికార పార్టీలో ‘పంచాయితీ’ రచ్చ.. ఇది నిజమేనా.?

పార్టీ గుర్తులతో సంబంధం లేకుండా జరిగిన పంచాయితీ ఎన్నికల్లో గెలుపు పట్ల ముఖ్యమంత్రి వైఎస్ జగన్ మోహన్ రెడ్డి వద్ద ప్రస్తావిస్తున్న అధికార పార్టీ నేతలు, అందునా మంత్రులు.. ‘అహో అద్భుతం..’ అని కొనియాడేస్తున్నారట. బాగా పనిచేశారంటూ ముఖ్యమంత్రి వారిని అభినందించేస్తున్నారట. పత్రికల్లో ప్రకటనలు ఇచ్చి మరీ, ‘ఇవి పార్టీల పరంగా జరిగే ఎన్నికలు కావు మొర్రో..’ అని చెప్పిన అధికార పక్షం, 80 శాతం పంచాయితీల్ని గెలచుకున్నామని చెప్పడం కంటే కామెడీ ఏముంటుంది. ఆ కామెడీని మించి, ఇప్పుడీ అభినందనల పర్వం నడుస్తోంది.

‘పంచాయితీ ఎన్నికల కథ ముగిసింది.. పార్టీ గుర్తుల మీద జరుగుతున్న ఎన్నికలు కాబట్టి మునిసిపల్, పరిషత్ ఎన్నికలపై ప్రత్యేక దృష్టి పెట్టాలి.. అన్ని స్థానాలూ గెలుపొందాలి..’ అని మంత్రులకు ముఖ్యమంత్రి హితోపదేశం చేశారట. ఇది నిజమేనా.? అంటే, అధికార పార్టీ అనుకూల మీడియాలో కూడా ఇలాంటి కథనాలే వస్తున్నాయి గనుక నిజమని నమ్మి తీరాల్సిందే. అయితే, పంచాయితీ ఎన్నికల్లో గెలిచేశామంటూ అధికార పార్టీ పెద్దలు చెబుతున్న నెంబర్ల పట్ల ముఖ్యమంత్రి అంత సంతృప్తిగా కనిపించడంలేదట. అందుకే, మంత్రులకు క్లాస్ పీకరట.. అంటూ ఓ ‘గుసగుస’ గట్టిగా వినిపిస్తోంది.

కుప్పంలో టీడీపీని దెబ్బకొట్టగలిగినా, మిగతా చోట్ల గట్టి పోటీ ఎదుర్కొన్నాం. టీడీపీ మాత్రమే కాదు, జనసేన కూడా గట్టి పోటీ ఇచ్చిందనే బావన ముఖ్యమంత్రి జగన్, పలువురు మంత్రుల వద్ద ప్రస్తావించారట. కొన్ని చోట్ల అధికార పార్టీ నేతలు, సొంత గ్రామాల్లో పార్టీ మద్దతుదారుల్ని గెలిపించుకోలేకపోవడం పట్ల ముఖ్యమంత్రి అసహనం వ్యక్తం చేశారట కూడా. ‘అబ్బే, అదేం లేదు..’ అని వైసీపీ నేతలు బుకాయిస్తున్నా, గ్రౌండ్ లెవల్‌లో ఏం జరిగిందో, ఎవరెవరు గెలిచారో ముఖ్యమంత్రికి నివేదికలు అందకుండా వుంటాయా.?

నిజానికి, పంచాయితీ ఎన్నికల్లో 80 శాతం గెలుపు అనేది చాలా చిన్న విషయం. ఇది అధికార పార్టీ అధికారికంగా చెబుతున్న నెంబర్ అయినా, దీనిని అధికార పార్టీ నేతలు మనస్ఫూర్తిగా నమ్మే పరిస్థితి లేదన్నది ఇన్‌సైడ్ సోర్సెస్ కథనం. పంచాయితీ తేడాలు నిజమే అయితే, మునిసిపల్ అలాగే పరిషత్ ఎన్నికల్లో అధికార పార్టీకి పెద్ద పెద్ద షాక్‌లే ఎదురయ్యే ప్రమాదం లేకపోలేదన్నమాట.