రాఘవ లారెన్స్ లీడ్ రోల్ లో పి. వాసు దర్శకత్వంలో వచ్చిన చిత్రం చంద్రముఖి 2. ఈ సినిమా ఇటీవలే థియేటర్లలో విడుదలై దారుణమైన ఫలితాన్ని చూరగొంది. బాక్స్ ఆఫీస్ వద్ద తెలుగు, తమిళ్ లో కూడా ఈ సినిమా డిజాస్టర్ గా నిలిచింది. అయితే దాన్నుండి త్వరగానే బయటపడ్డ లారెన్స్ ఇప్పుడు తన తర్వాత చిత్రం జిగర్తాండ డబల్ ఎక్స్ చిత్రాన్ని ప్రమోట్ చేస్తున్నాడు. నవంబర్ లో ఈ సినిమా విడుదలవుతుంది.
ఈరోజు జరిగిన ప్రెస్ మీట్ లో లారెన్స్ మీడియా ప్రశ్నలకు సమాధానాలిచ్చాడు. ఈ సందర్భంగా చంద్రముఖి 2 ప్లాప్ ను ఎలా తీసుకున్నారు అని అడగ్గా దానికి కొంచెం వేదాంతం కలిపి సమాధానమిచ్చాడు లారెన్స్.
“చంద్రముఖి 2 చేసినందుకు పారితోషికం అందుకున్నా. పైగా నలుగురు హీరోయిన్లతో డ్యాన్స్ చేసే అవకాశమొచ్చింది. అదే చాలా ఎక్కువ. గ్రూప్ డ్యాన్సర్ గా కెరీర్ మొదలుపెట్టా. డ్యాన్స్ మాస్టర్ అయితే చాలు అనుకున్నా. ఇప్పుడు హీరోగా కూడా సినిమాలు చేస్తున్నా. నా గ్లామర్ పెట్టుకుని సినిమాలు రావడమే దేవుడు ఇచ్చిన వరం,” అని సమాధానమిచ్చాడు.