కొడాలి ఆదేశంతో నీటి నాణ్యతను పరిశీలించిన లంక దాసరి

ఆంధ్రప్రదేశ్‌ ముఖ్యమంత్రి వైఎస్‌ జగన్‌మోహన్‌రెడ్డి తన క్యాబినెట్‌లో గుడివాడ ఎమ్మెల్యే కొడాలి నానికి కీలక శాఖ ఇవ్వబోతున్నారన్న ప్రచారం జరుగుతున్న సంగతి తెల్సిందే. అయితే ఈ ప్రచారం సంగతెలా వున్నా, సొంత నియోజకవర్గంలో పలు అభివృద్ధి కార్యక్రమాలపై, ముఖ్యంగా నీటి సమస్యపై దృష్టిపెట్టారు ఎమ్మెల్యే కొడాలి శ్రీ వెంకటేశ్వరరావు అలియాస్‌ కొడాలి నాని.

గుడివాడ మునిసిపాలిటీ పరిధిలో తాగు నీటి సమస్య పరిష్కారం కోసం మాజీ మున్సిపల్‌ ఛైర్మన్‌ లంక దాసరి ప్రసాదరావుతో కలిసి సమీక్ష జరిపిన కొడాలి, నీటి సరఫరా మెరుగు పర్చడంపై తగు చర్యలు తీసుకున్నారు. కోడాలి ఆదేశాలు, లంక దాసరి రంగ ప్రవేశంతో బుధవారం నుంచి రోజువారీ మంచినీళ్ళు వస్తున్న దరిమిలా, నీటి నాణ్యత అనేది ముఖ్య అంశంగా మారింది. నీటి నాణ్యతను కొడాలి ఆదేశాలనుసారం లంక దాసరి పరిశీలించి, సంతృప్తి వ్యక్తం చేశారు.

మారుతున్న వాతావరణ పరిస్థితుల్లో నీటిని కాచి, చల్లార్చి, వడపోసి తాగడం మంచిదని లంక దాసరి ప్రసాదరావు ప్రజలకు సూచిస్తున్నారు. నీటిలో క్లోరిన్‌ శాతం పరిమిత స్థాయిలో వుందని చెప్పారాయన. లంక దాసరి, ఇటీవల టీడీపీ నుంచి అకారణంగా సస్పెండ్‌ అయిన విషయం విదితమే. త్వరలోనే ఆయన కొడాలి నాని సమక్షంలో వైఎస్సార్‌ కాంగ్రెస్‌ పార్టీలో చేరనున్నట్లు ప్రచారం జరుగుతోంది. రాజకీయాల కంటే ప్రస్తుతం ప్రజల సమస్యల పరిష్కారంపైనే ఎక్కువ దృష్టి పెట్టాననీ, మాజీ మున్సిపల్‌ ఛైర్మన్‌ అయిన తనకు ప్రజా సమస్యలపై వున్న అవగాహన నేపథ్యంలో ఎమ్మెల్యే కొడాలి నాని ఇస్తున్న ప్రాధాన్యం పట్ల తాను సంతృప్తిగా వున్నానని లంక దాసరి ప్రసాదరావు చెబుతున్నారు.