ఆంధ్రప్రదేశ్‌లో తగ్గిన ‘కమ్మ’దనం.!

ఉమ్మడి ఆంధ్రప్రదేశ్‌ విడిపోవడానికి కారణం కమ్మ సామాజిక వర్గమే అనే అభిప్రాయం ఇప్పటికీ చాలా మందిలో ఉంది. తెలంగాణా భాషా, యాస, ఉనికి మీద దాడి చేసింది ఆ కమ్మ సామాజిక వర్గమేనంటారు కొందరు. ఇక్కడ సామాజిక వర్గం అంటే, సామాజిక వర్గానికి చెందిన రాజకీయ నాయకులని అర్ధం. అందులోనూ అందరూ కాదు.. కొందరు మాత్రమే. ఉమ్మడి ఆంధ్రప్రదేశ్‌ విడిపోయిన తర్వాత 13 జిల్లాల ఆంధ్రప్రదేశ్‌లో వీరి పెత్తనం మరీ ఎక్కువైపోయింది. చంద్రబాబు ముఖ్యమంత్రి అయ్యాక, మొత్తంగా ఈ సామాజిక వర్గం చుట్టూనే అధికారం కేంద్రీకృతమైపోయింది. అధికారుల బదిలీ దగ్గర్నుంచీ, కాంట్రాక్టర్ల దాకా, కేటాయింపుల దగ్గర్నుంచీ, అభివృద్ధి ఫలాల దాకా అంతా ఆ సామాజిక వర్గం కనుసన్నల్లోనే నడిచింది. రాజధాని అమరావతి కూడా ఆ సామాజిక వర్గం కోసమే అన్నట్లు తయారైంది పరిస్థితి. ఇంతలా వ్యవస్థల్ని చంద్రబాబు భ్రష్ఠుపట్టించేశారు.

రాజకీయమంటే, తన సామాజిక వర్గమే అనుకున్నారాయన. ఆ ఎఫెక్ట్‌ తాజా ఎన్నికలపై చాలా గట్టిగా పడింది. పరిస్థితి తీవ్రతను గుర్తించిన కొందరు కమ్మ సామాజిక వర్గ నేతలు ముందస్తుగానే అప్రమత్తమయ్యారు. టీడీపీ కుల గజ్జిని వదిలించుకున్నారు. అయితే, తాజా ఎన్నికల్లో 17 మంది మాత్రమే కమ్మ సామాజిక వర్గానికి చెందిన వారు అసెంబ్లీకి వెళ్లారు (పోటీ చేసినవి 42). గతంలో ఈ సంఖ్య 33 (2014 లో). అంతకు ముందు 28 (2009 లో). ఇంత గణనీయంగా కమ్మ సామాజిక వర్గం ఏపీ రాజకీయ తెరపై పలచన అయిపోవడం ఆ సామాజిక వర్గ నేతల్లో తీవ్ర చర్చనీయాంశమవుతోంది.

కమ్మ సామాజిక వర్గం కావచ్చు, కాపు సామాజిక వర్గం కావచ్చు. మరో సామాజిక వర్గం కావచ్చు.. నేతలకు కులాభిమానం ఉంటే తప్పు కాదు. కేవలం కులం పేరు చెప్పి, రాజకీయం చేయాలనుకున్నప్పుడే పరిస్థితులు తిరగబడతాయి. చంద్రబాబు కులతప్పు టీడీపీలో కమ్మ సామాజిక వర్గానికి పెద్ద దెబ్బ తగిలేలా చేసింది. అయితే, ఎన్నికల ముందర పోలీస్‌ శాఖలో బదిలీల సందర్భంగా కమ్మ సామాజిక వర్గానికే చంద్రబాబు సర్కార్‌ పెద్ద పీట వేసిందనే విమర్శలు వినిపించాయి. అదెంత నిజం.? అనేది వేరే చర్చ. జరగాల్సిన నష్టం మాత్రం జరిగిపోయింది. చంద్రబాబు ఒకప్పుడు తాను పెద్ద మాదిగనని చెప్పుకున్నారు. నలభయ్యేళ్ల రాజకీయ అనుభవం ఉన్న చంద్రబాబు కుల పిచ్చితో ఉంటారని ఎవరూ అనుకోరు. కానీ ఆయన చేష్టలూ, చుట్టూ ఉన్న వారి రంకెలు వెరసి ఆంధ్రప్రదేశ్‌లో కమ్మ సామాజిక వర్గాన్ని రాజకీయంగా దాదాపుగా డైల్యూట్‌ చేసేసింది. భవిష్యత్తులో మళ్లీ పుంజుకోవడం సాధ్యమేనా.? ఇది మిలియన్‌ డాలర్ల ప్రశ్న.

రాజకీయమంటే, కులమతాలకు అతీతంగా ఉండాల్సిన వ్యవహారం. కానీ, కులం గురించీ, మతం గురించీ మాట్లాడకుండా రాజకీయాల్ని విశ్లేషించలేని పరిస్థితి వచ్చింది. స్వర్గీయ నందమూరి తారక రామారావు కమ్మ సామాజిక వర్గానికి చెందిన వాడైనా ఆయన్ని ఎవరూ ఎప్పుడూ ఆలా చూడలేదు. అన్ని కులాలకూ, అన్ని మతాలకూ ప్రాధాన్యత ఇచ్చారాయన. చంద్రబాబు హయాంలో తెలుగుదేశం పార్టీ మాత్రం క్రమ క్రమంగా భ్రష్ఠు పడుతూ వచ్చి కులమే పరమావధి అన్నట్లుగా మారింది. ఈ పతనం ఎందాకా.? ఆంధ్రప్రదేశ్‌లో సంఖ్యాబలం పరంగా చూస్తే కమ్మ సామాజిక వర్గానిది చాలా వెనుక స్థానం. కానీ, రాజకీయంగా చాలా ముందుకు దూసుకొచ్చింది. వచ్చినట్లే వచ్చి మళ్లీ కిందికి పడిపోతోంది. ఈ ఘనత ముమ్మాటికీ చంద్రబాబుదే.