వారాహి వర్సెస్ గొడ్డలి.! దేన్ని చూసి జనం ఓట్లేస్తారు.?

రాజకీయ పార్టీలకు చెందిన అధికార ప్రతినిధులకు వాగ్ధాటి అవసరం. కొందరు పెద్ద గొంతేసుకుని అరిచేస్తుంటారు. ఇంకొందరు పాయింట్ పట్టుకుని మాట్లాడుతుంటారు. వైసీపీ అధికార ప్రతినిథి వెంకటరెడ్డి, అడ్డగోలుగా వాదించడంలో దిట్ట. ఆయనకు ప్రతిసారీ తనదైన స్టయిల్లో కౌంటర్ ఎటాక్ ఇస్తుంటారు జనసేన అధికార ప్రతినిథి రాయపాటి అరుణ.

తాజాగా ‘వారాహి’ విషయమై ఓ న్యూస్ ఛానల్‌లో చర్చ సందర్భంగా ‘ప్రచార రధాన్ని చూసి.. అందాన్ని చూసి.. కత్తుల్ని చూసి ఓట్లెయ్యరు..’ అంటూ వెంకటరెడ్డి సెటైర్ వేశారు. జనసేన అధికార ప్రతినిథి రాయపాటి అరుణ కూడా ఘాటుగానే స్పందించారు.

‘మరి, దేన్ని చూసి ఓటేస్తారు.? గొడ్డలి పోటుని చూసి ఓట్లేస్తారా.? కోడి కత్తి గాటుని చూసి ఓటేస్తారా.?’ అంటూ రాయపాటి అరుణ కౌంటర్ ఎటాక్ ఇచ్చేసరికి, వైసీపీ అధికార ప్రతినిథి వెంకటరెడ్డికి సౌండ్ లేకుండా పోయింది.

ఒక్కటి మాత్రం నిజం. ఓ కోటి రూపాయలు ఖర్చు చేసి, ‘వారాహి’ వాహనం గురించి సోషల్ మీడియాలో, మెయిన్ స్ట్రీమ్ మీడియాలో చెప్పుకుంటే వచ్చే పబ్లిసిటీ, జనసేన పార్టీకి ఉచితంగానే వచ్చింది.. అదీ వైసీపీ కారణంగా. ముఖ్యమంత్రి తప్ప, ‘వారాహి’ గురించి దాదాపుగా వైసీపీ ముఖ్య నేతలంతా మాట్లాడేశారు.

మంత్రులు కొందరు రివ్యూలు ఇచ్చేశారు. ఇంకొందరైతే మోటారు వాహనాల చట్టం గురించి వివరణాత్మకంగా చెప్పేశారు. చిత్రమేంటంటే, వైసీపీ నాయకుల్లో చాలామంది మోటారు వాహనాల చట్ట నిబంధనలు పట్టకుండా తమ సొంత కార్లను నడుపుతున్నారు. ఆయా నేతల కార్ల నెంబర్ ప్లేట్లను చూస్తే ఆ విషయం అర్థమవుతుంది.

ఏదిఏమైనా, ‘వారాహి’ వ్యవహారం ఇప్పట్లో సద్దుమణిగేలా లేదు. కంటెంట్ వున్నోడి కటౌట్ చాలు.. అంటూ పవన్ కళ్యాణ్‌ని ఉద్దేశించి ఓ డైలాగ్ వుంటుంది ‘గబ్బర్ సింగ్’ సినిమాలో.

పవన్ కళ్యాణ్ ఫొటో, పవన్ కళ్యాణ్ వాహనం.. వాట్ నాట్.. అన్నటికీ విపరీతమైన ఫాలోయింగ్. జనసేన పార్టీకి ఫ్రీ పబ్లిసిటీ ఇవ్వడానికి విలువైన చాలా సమయాన్ని వృధా చేసుకునే మంత్రులున్నారంటే.. దటీజ్ పవన్ కళ్యాణ్.!