ప్రజలు అడ్డుకుంటున్నా.. జగన్ ఆగేలా లేడుగా ..!!

కష్టమో నష్టమో గత ప్రభుత్వం ఆధ్వర్యంలో అమరావతిని రాజధానిగా ఏర్పాటు చేశారు. రాజధానిని అప్పటి ప్రతిపక్షం వైకాపా కూడా ఒప్పుకుంది. ఒప్పుకోవడంతో ప్రభుత్వం రాజధాని కోసం భూములను సేకరించింది. భూసేకరణ తరువాత రాజధాని ప్రాంతంలో కొన్ని నిర్మాణాలను ఏర్పాటు చేశారు. అయితే, జగన్ అధికారంలోకి వచ్చిన తరువాత అమరావతిని మార్చాలి అనే ఒకేఒక్క ఆలోచనతో ప్రభుత్వం పనిచేసుకుంటూ పోయింది. ఎందుకు మార్చబోతుంది అనే విషయాలను మాత్రం బయటకు చెప్పడం లేదు.

ఏ ఉద్దేశ్యంతో మార్చాలని అనుకున్నా, అందుకు అమరావతి రైతులు మాత్రం ససేమిరా అంటున్నారు. జగన్ పట్టువదలడం లేదు. మండలిలో అడ్డుకున్నారని చెప్పి ఏకంగా మండలిని రద్దు చేయాలని ప్రభుత్వం నిర్ణయం తీసుకుంది. తీర్మానం చేసి కేంద్రానికి పంపించింది. ఇప్పుడు మండలి విషయం కేంద్రం కోర్టులో ఉన్నది. కేంద్రం ఎప్పుడు దీనికి సంబంధించిన బిల్లును ప్రవేశపెడుతుంది అన్నది తెలియాల్సి ఉంది.

అయితే, అమరావతి ప్రజలు వైకాపా తీసుకున్న నిర్ణయంపై చాలా సీరియస్ అవుతున్నారు. బంగారం పండే భూములను అమరావతి కోసం ఇస్తే… ఇప్పుడు ప్రభుత్వం అమరావతిని మూడు ముక్కలు చేసి తరలించడం భావ్యం కాదని మండిపడుతున్నారు. జగన్ ను నమ్మింది, జగన్ పార్టీకి ఓటు వేసింది ఈ ప్రాంతం ప్రజలే అని, ఎక్కువగా ఈ ప్రాంతం నుంచే ఓటింగ్ జరిగిందని ప్రజలు అంటున్నారు. నమ్మిన జగన్ తమను నట్టేట ముంచారని వారు వాపోతున్నారు.

పార్టీలకు అతీతంగా రైతులు, ప్రజలు భారీ ర్యాలీలు నిర్వహించారు. జాతీయ జెండాను చేతబూని వైకాపాకు వ్యతిరేకంగా నినాదాలు చేశారు. తమ కడుపుమంట ఢిల్లీకి తెలిసేలా ర్యాలీలతో హోరెత్తిస్తున్నారు. కొంతమంది రైతులు ఈ బాధను తట్టుకోలేక గుండెపోటుతో మరణిస్తున్నారు. కానీ, ప్రభుత్వంలో ఎలాంటి చలనం రావడం లేదు. కనికరం చూపించడం లేదు. సొంత ప్రయోజనాల కోసమే అమరావతి నుంచి కార్యనిర్వాహక రాజధానిని విశాఖకు తరలిస్తున్నారని ప్రజలు అంటున్నారు.