ఇన్‌సైడ్‌ స్టోరీ: చంద్రబాబుకి ‘సాయం’ చేస్తున్న జగన్‌.!

ఆంధ్రప్రదేశ్‌ మాజీ ముఖ్యమంత్రి నారా చంద్రబాబునాయుడికి, ఆంధ్రప్రదేశ్‌ ప్రస్తుత ముఖ్యమంత్రి వైఎస్‌ జగన్‌ మోహన్‌రెడ్డి ‘సాయం’ చేస్తున్నారు. ఔను, ఇది నూటికి నూరు పాళ్ళూ నిజం. రాజధాని అమరావతి జోలికి వెళ్ళకుండా వైఎస్‌ జగన్‌ మోహన్‌రెడ్డి తన పాలనను కొనసాగించి వుంటే, ఇప్పుడు రాజధాని అమరావతిలో ఉద్రిక్త పరిస్థితులు చోటు చేసుకునేవి కావు.

అమరావతి పేరుతో చంద్రబాబు ఈ స్థాయిలో పొలిటికల్‌ స్టంట్లు చేయగలుగుతున్నారంటే, దానికి కారణం ముమ్మాటికీ ముఖ్యమంత్రి వైఎస్‌ జగన్‌ మోహన్‌రెడ్డే. అమరావతి పరిధిలో తెలుగుదేశం పార్టీ గత ఎన్నికల్లో దారుణ పరాజయాన్ని చవిచూసింది. స్వయానా చంద్రబాబు తనయుడు లోకేష్‌ ఓడిపోయారు మంగళగిరి నియోజకవర్గంలో. కానీ, ఈక్వేషన్స్‌ మారుతున్నాయి. చంద్రబాబు సైతం ఊహించని స్థాయిలో ఆయనకు రాజకీయంగా మద్దతు పెరుగుతోంది. ఇదంతా వైఎస్‌ జగన్‌ మోహన్‌రెడ్డి పుణ్యమే.

తెలిసి చేస్తున్నారా.? తెలియక చేస్తున్నారా.? అసలు వైఎస్‌ జగన్‌ మోహన్‌ రెడ్డి ఆలోచన ఏంటి.? పరిపాలనను గాలికొదిలేసి, అమరావతిని అయోమయంలోకి నెట్టేయడమే లక్ష్యంగా పెట్టుకున్నట్టున్నారు వైఎస్‌ జగన్‌. లేకపోతే, 23 మంది ఎమ్మెల్యేలు, ముగ్గురు మాత్రమే ఎంపీలు వున్న పార్టీకి బలం పెంచేలా.. అదీ ప్రతిపక్షానికి ఊతమిచ్చేలా అధికార పార్టీ ‘చచ్చు’ నిర్ణయాలు తీసుకోవడమేంటి.?

రాజధాని అమరావతిలో మహిళలు నడుం బిగించారు.. ప్రభుత్వానికి వ్యతిరేకంగా. జాతీయ మహిళా కమిషన్‌, రాజధానిలో మహిళా రైతులపై పోలీసుల దమనకాండపై తీవ్రంగా స్పందించింది. తాజాగా, చంద్రబాబు విజయవాడలో హల్‌చల్‌ చేస్తే, ఆయన మీద మహిళా లోకం పూలు జల్లింది. ఇదంతా వైఎస్‌ జగన్‌ ఎందుకు చేయిస్తున్నట్లు.?

చంద్రబాబు సహా నేతల్ని అరెస్ట్‌ చేసి, వాహనంలో తరలించే క్రమంలో అత్యుత్సాహం చూపిన పోలీసులకు, వాహనం తాలూకు తాళం పోవడంతో ముచ్చెమటలు పట్టాయి. ఇవన్నీ దేనికి సంకేతం.? ఏదో చెయ్యబోయి, ఇంకోటేదో చేసేస్తోంది అటు ప్రభుత్వం, ఇటు పోలీసు వ్యవస్థ. ఒక్కటి మాత్రం నిజం, వైఎస్సార్‌ కాంగ్రెస్‌ ప్రభుత్వానికి వేరే శతృవు అక్కర్లేకుండా.. తమ ప్రభుత్వ నిర్ణయాలే తమకు గొడ్డలిపెట్టులా వైఎస్‌ జగన్‌ సర్కార్‌ చేసుకుంటుండడం హాస్యాస్పదం కాక మరేమిటి.?