మడమ తిప్పిన జగన్‌: చంద్రబాబు ఇంటి జోలికి వెళ్ళరట.!

కృష్ణా నదీ గర్భంలోకి చొచ్చుకు వెళ్ళిన కొన్ని ప్రత్యేక నిర్మాణాలకు సంబంధించి ‘పగలగొట్టుడు’ వ్యవహారం ఈ మధ్యనే ప్రారంభమయ్యింది. ముఖ్యమంత్రి అవుతూనే, వైఎస్‌ జగన్‌మోహన్‌రెడ్డి తీసుకున్న తొలి నిర్ణయం ప్రజా వేదికను కూల్చేయడం. కోట్లాది రూపాయల ప్రజాధనం మట్టిపాలైపోయింది ఆ సంఘటనతో. పోయింది జనం సొమ్ము కదా, వైఎస్‌ జగన్‌ జేబులో సొమ్ము కాదు కాబట్టి.. ఆయన చాలా ధైర్యంగా ఆ నిర్ణయం తీసేసుకున్నారు. చంద్రబాబు నివాసం వుంటోన్న ఇంటిని కూల్చేయడం వైఎస్‌ జగన్‌ అసలు లక్ష్యమనీ, ఆ ఘనకార్యం చేపట్టడానికి ముందుగా ప్రజా వేదికను కూల్చేశారనీ వైఎస్సార్సీపీ నేతలే చెబుతున్న విషయం.

ప్రజా వేదిక కూలింది.. చంద్రబాబు ఇల్లు మాత్రం అలాగే వుంది. ఇక్కడ చంద్రబాబుకి వచ్చిన కష్టమేమీ లేదు. పార్టీ కార్యకలాపాలకోసం, ప్రతిపక్ష నేతగా ప్రజల్ని కలిసేందుకోసం ప్రజావేదికను కోరిన చంద్రబాబుకి ఆ భవనాన్ని ఇచ్చేసి, అద్దెను వసూలు చేసినా.. అది రాష్ట్రానికి ఎంతో కొంత ఉపయోగపడేది. పోనీ, ప్రజా వేదికను కూల్చేశాక.. చంద్రబాబు ఇంటికి వెళ్ళి అధికారులు.. కనీసం, గేటు అయినా పగలగొట్టారా.? అంటే అదీ లేదు.

చంద్రబాబు ఇంటి సమీపంలో మరో వ్యక్తికి చెందిన ఓ నిర్మాణాన్ని పగలగొట్టారు అధికారులు. ఆ తర్వాత మళ్ళీ వ్యవహారం సైలెంటయిపోయింది. చంద్రబాబు నివాసం వుంటోన్న ఇంటి యజమాని కోర్టుకు వెళ్ళారు, ప్రభుత్వం పంపిన నోటీసులపై. దాంతో, ఈ వ్యవహారం ఇప్పట్లో ఓ కొలిక్కి వచ్చే అవకాశమే లేకుండా పోయింది. ఈ చర్యలతో వైఎస్‌ జగన్‌ అహం తగ్గుతుందేమోగానీ, చంద్రబాబుకి వచ్చిన నష్టమేమీ లేదని చిన్న పిల్లాడినడిగినా చెబుతాడు.

పైగా, ఇక్కడ వైఎస్‌ జగన్‌ అహం కూడా తగ్గే పరిస్థితి లేదు. ఎందుకంటే, ఏదీ ప్రభుత్వానికి అనుకూలంగా జరగడంలేదు కాబట్టి. ఇక్కడ మేటర్‌ క్లియర్‌.. వైఎస్‌ జగన్‌ దూకుడు ప్రదర్శించడానికి వీల్లేదు. అంటే, ఆయన ‘మడమ’ తిప్పేసినట్లే. లేదూ, ఎట్టి పరిస్థితుల్లోనూ ఆ భవనాన్ని కూల్చేసి, చంద్రబాబుని రోడ్డున పడేయాలనే సంకల్పంతో ఇంకా గట్టిగా ముందడుగు వేస్తే.. అది జగన్‌ మీద చాలా నెగెటివ్‌ ఇంపాక్ట్‌ చూపుతుంది.

అమరావతి నిర్మాణాన్ని పక్కన పెట్టి, పోలవరం ప్రాజెక్టుని పట్టించుకోకుండా.. ప్రజా వేదికను కూల్చేసి, చంద్రబాబు ఇంటిని కూల్చేయాలనుకోవడం హేయమైన చర్య కాకపోతే మరేమిటి.? ఇదే విషయమై పార్టీ నేతలు వైఎస్‌ జగన్‌ని ఎంత వారిస్తున్నా ఆయన వినడంలేదట. ‘ఇకనైనా పద్దతి మార్చుకుంటే మంచిది.. లేదంటే ప్రభుత్వం పట్ల ప్రజల్లో వ్యతిరేకత పెరిగిపోతుంది.. చంద్రబాబుకి అనవసరంగా మనమే ఎనర్జీ ఇచ్చినట్లవుతుంది..’ అంటూ సీనియర్‌ నేతలు పలువురు వైఎస్‌ జగన్‌కి తాజాగా క్లాస్‌ తీసుకున్నారట. ఆ క్లాస్‌ గనుక ఫలిస్తే, జగన్‌ వెనుకడుగు వేస్తారేమో వేచి చూడాలి.