‘వాల్మీకి’ కోసం ‘గ్యాంగ్ లీడర్’ వెనక్కి తగ్గుతాడా.?

నాని హీరోగా తెరకెక్కిన ‘గ్యాంగ్ లీడర్’ సినిమాకి పోస్ట్‌ పోన్‌ కష్టాలు మరోమారు ఎదురయ్యేలా వున్నాయన్నది టాలీవుడ్‌ సర్కిల్స్‌లో హల్‌చల్‌ చేస్తోన్న హాటెస్ట్‌ గాసిప్‌. అంతా అనుకున్నట్టు జరిగి వుంటే, ఆగస్ట్‌ 30న ‘గ్యాంగ్ లీడర్’ సినిమా ప్రేక్షకుల ముందుకు రావాల్సి వుంది. అయితే, ‘సాహో’ సినిమా ఆగస్ట్‌ 15 నుంచి 30వ తేదీకి పోస్ట్‌పోన్‌ కావడంతో నాని ‘జెంటిల్‌’గా వెనక్కి తప్పుకోవాల్సి వచ్చింది.

‘సాహో మన సినిమా.. మన తెలుగు సినిమా..’ అంటూ ప్రభాస్‌ మీద అమితమైన అభిమానాన్ని చాటుకుంటూ నాని, ‘గ్యాంగ్‌ లీడర్‌’ పోస్ట్‌పోన్‌ అయిన విషయాన్ని వెల్లడించిన విషయం విదితమే. అయితే, సెప్టెంబర్‌ 13వ తేదీకి ‘గ్యాంగ్ లీడర్’ ఫిక్స్‌ అయినా, ఇప్పుడెందుకో ‘పోస్ట్‌పోన్‌’ ఆలోచన చేయడమే మంచిదన్న నిర్ణయానికి నానితోపాటు నిర్మాతలు కూడా వచ్చేసినట్లు తెలుస్తోంది. ‘వాల్మీకి’కి విషెస్‌ అందిస్తూ, ‘గ్యాంగ్ లీడర్’ కూడా వస్తోందని నాని చెప్పడం, నానికి ‘వాల్మీకి’ తరఫున వరుణ్‌ తేజ్‌ విషెస్‌ అందించడం తెలిసిన విషయాలే.

ఓ పక్క ‘గ్యాంగ్ లీడర్’ ప్రమోషన్స్‌ని సెప్టెంబర్‌ 13న విడుదలకు అనుగుణంగా ఉధృతం చేస్తూనే, ఇంకోపక్క పోస్ట్‌పోన్‌ విషయమై దర్శక నిర్మాతలు సమాలోచనలు చేస్తున్నారన్న వార్త వెలుగు చూసింది. ప్రస్తుతానికైతే ‘గ్యాంగ్ లీడర్’ దర్శక నిర్మాతలు, సినిమా పోస్ట్‌పోన్‌కి సంబంధించి ఎలాంటి అధికారిక ప్రకటనా విడుదల చేయలేదు.

సెప్టెంబర్‌ 13న ఒకవేళ ‘గ్యాంగ్ లీడర్’ విడుదల కాకపోతే, 20వ తేదీకి పోస్ట్‌పోన్‌ అవ్వొచ్చన్నది అత్యంత విశ్వసనీయ వర్గాల సమాచారమ్‌. ఒకే రోజు రెండు సినిమాలు రిలీజ్‌ అయినా, దేనికి వుండే ఆడియన్స్‌ దానికి వుంటారు. సో, నాని అయినా.. వరుణ్‌తేజ్‌ అయినా కంగారు పడాల్సిన పనే లేదన్నది మెజార్టీ అభిప్రాయం.