అన్నాడీఎంకే పంచాయతీ తెగింది.. పళనిస్వామికే ఓపీ‘ఎస్’

తమిళనాడు అధికార పార్టీ అన్నాడీఎంకేలో గత కొన్నినెలలుగా నెలకొన్న ప్రతిష్టంభనకు తెరపడింది. వచ్చే ఎన్నికల్లో పార్టీ తరఫున సీఎం అభ్యర్థి ఎవరనే విషయంపై సాగుతున్న పంచాయతీకి పుల్ స్టాప్ పడింది. సీఎం అభ్యర్థిగా ప్రస్తుత ముఖ్యమంత్రి ఈకే పళనిస్వామి (ఈపీఎస్) ఎన్నికయ్యారు. ఈ విషయాన్ని సీఎం అభ్యర్థిత్వం కోసం పోటీ పడిన పార్టీ సమన్వయకర్త, డిప్యూటీ చీఫ్ మినిస్టర్ ఓ పన్నీర్ సెల్వం (ఓపీఎస్) బుధవారం జరిగిన పార్టీ జనరల్ బాడీ సమావేశంలో ప్రకటించారు.

నిజానికి సీఎం అభ్యర్థి నేనంటే నేనంటూ గత కొంతకాలంగా ఇరువురూ వాదులాడుకుంటున్నారు. గతవారం జరిగిన కార్యవర్గ సమావేశంలో ఇరువర్గాలూ తమ తమ నేతలకు మద్దతుగా పెద్దపెట్టున నినాదాలు చేశారు. ఈ సందర్భంగా పన్నీర్, పళని మధ్య వాగ్దుద్ధం జరిగింది. తనను సీఎంగా రెండుసార్లు దివంగత జయలలితే ఎంపిక చేసినందున తనకే అవకాశం ఇవ్వాలని పన్నీర్ పేర్కొనగా.. ఇద్దరినీ శశికళే ఎంపిక చేశారని పళనిస్వామి వాదించారు.

ఈ నేపథ్యంలో ఈ అంశాన్ని తేల్చేందుకు 11 మందితో కమిటీ వేయాలని పన్నీర్ ప్రతిపాదించగా.. కమిటీ అవసరం లేదని, పార్టీపరంగానే నిర్ణయం తీసుకోవచ్చని పళనిస్వామి స్పష్టంచేశారు. దాదాపు 5 గంటలపాటు సమావేశం వాడీవేడిగా జరిగినా ఈ విషయంలో ఏకాభిప్రాయానికి రాలేకపోయారు. ఈ నేపథ్యంలో తాజాగా జరిగిన జనరల్ బాడీలో ఈ అంశంపై మంగళవారం ఇరువురు నేతలతోనూ పార్టీ నాయకులు, మంత్రులు సుదీర్ఘంగా చర్చించారు.

మంత్రులు తంగమణి, వేలుమణి, జయకుమార్, షణ్ముగం, ఉదయ్ కుమార్ లతోపాటు పార్టీ కోఆర్డినేటర్లు కేపీ మునుస్వామి, వైతలింగం తదితరులు పన్నీర్ సెల్వంతో బుధవారం తెల్లవారుజాము వరకు చర్చలు జరిపారు. అనంతరం ఏకాభిప్రాయానికి రావడంతో పళనిస్వామిని సీఎం అభ్యర్థిగా పన్నీర్ ప్రకటించారు.

ఇదే సందర్భంలో పార్టీ స్టీరింగ్ కమిటీని కూడా ప్రకటించారు. పళనిస్వామి వర్గానికి చెందిన ఆరుగురు, పన్నీర్ అనుచరులు ఐదుగురుతో కలిపి ఈ స్టీరింగ్ కమిటీని ఏర్పాటు చేశారు. మొత్తానికి ఇరువురు నేతలూ సయోధ్యకు రావడంతో అన్నాడీఎంకేలో ఎలాంటి చీలికా రాకుండానే ప్రస్తుత సమస్య పరిష్కారమైంది. పార్టీపరంగా ఉన్న సమస్యలు సర్దుబాటు అయిన నేపథ్యంలో ఇక ఎన్నికలపై దృష్టి పెడతామని అన్నాడీఎంకే నేతలు పేర్కొన్నారు.