మాస్.. క్లాస్.. కామెడీ.. రౌద్రం.. సెంటిమెంట్.. ఇలా ఎటువంటి పాత్ర చేసినా అందులో వైవిధ్యం చూపడమే చిరంజీవి ప్రత్యేకత. కెరీర్ మొదట్లోనే చిరంజీవి ఇటువంటి పాత్రల్లో నటించారు. వీటిలో జాతర, ఆలయ శిఖరం, ఊరికిచ్చిన మాట సినిమాలు ఉన్నాయి. ఆలయ శిఖరం ఫ్యామిలీ సెంటిమెంట్ సినిమా. తమను దూరం చూసిన అన్నను ధ్వేషించే తమ్ముడిగా.., కుటుంబ బాధ్యతలను నిర్వర్తించే కొడుకుగా నటించారు. అన్నను ప్రశ్నించే సన్నివేశాల్లో చిరంజీవి భావోద్వేగ నటన చూడొచ్చు. తాను ప్రేమగా చూసుకున్న గుర్రం దూరమైనప్పుడు చిరంజీవి హావభావాలు, భావోద్వేగ నటన ఆకట్టుకుంటాయి. సరైన పాత్ర పడితే చిరంజీవి నటన ఏంటో చూపిన సినిమా ఆలయ శిఖరం.
జాతర..
జాతర సినిమాలో చిరంజీవి చదువుకున్న యువకుడిగా గ్రామంలో జరుగుతున్న దౌర్జన్యాలను ఎదిరించే పాత్రలో నటించారు. సొంత అన్నను మోసం చేసి తమ భూమిని కాజేయాలని చూసిన కామంధులపై పోరాడే పాత్ర. చదువుకు తగ్గ ఉద్యోగం రాకపోయినా వ్యవసాయం చేయాలని భావించే పాత్ర. గ్రామంలో ప్రజలను పీడించే పెత్తందార్లను ఎదిరించి పేదలను సంఘటితం చేసి స్ఫూర్తి నింపే యువకుడి పాత్రలో నటించారు. అన్నదమ్ముల మధ్య సంఘర్షణ, తల్లీ కుమారుల మధ్య అనుబంధం, బావామరదళ్ల మధ్య ప్రేమ, గ్రామంలో జరిగే జాతర.. పూర్తి పల్లెటూరి వాతావరణంలో తెరకెక్కిన సినిమాగా చెప్పాలి. నటనలో తనను తాను మలచుకున్న సినిమాల్లో ఈ సినిమా ఒకటి.
ఊరికిచ్చిన మాట..
ఊరికిచ్చిన మాట సినిమాలో చిరంజీవి అక్షరాస్యుడిగా నటించారు. తనకు చదువు లేకపోయినా తమ్ముడికి చదువు చెప్పించి డాక్టర్ ను చేయాలనే అన్న పాత్ర. గ్రామస్థుల సాయంతో డాక్టరైన తమ్ముడు పట్నంలో స్థిరపడి ఊరికిచ్చిన మాట మర్చిపోతే ఆ మాట కోసం తనప పడే పాత్రలో చిరంజీవి ఒదిగిపోయారని చెప్పాలి. పూర్తి గ్రామీణ యువకుడిగా ఊరికోసం తాపత్రయపడే వ్యక్తిగా చిరంజీవి నటన కన్నీళ్లు తెప్పిస్తుందంటే అతిశయోక్తి కాదు. సినిమాలో నటన, ఫైట్స్, సెంటిమెంట్ సన్నివేశాల్లో చిరంజీవి నటనతో ప్రేక్షకుల్ని మెప్పించారు. పూర్తి పల్లెటూరి యాస, ఆహార్యం, అమాయకత్వం, తమ్ముడిపై ప్రేమ, గ్రామ ప్రజలకు ఇచ్చిన మాట తప్పి.. మానసిక సంఘర్షణ పడే పాత్రలో చిరంజీవి ఒదిగిపోయారు.