చంద్రబాబూ.. ‘సున్నా’ కొట్టేందుకేనా జమిలి ఆరాటం.?

తెలుగుదేశం పార్టీ అధినేత, మాజీ ముఖ్యమంత్రి నారా చంద్రబాబునాయుడు వున్నపళంగా మళ్ళీ తనకు అధికారం దక్కేయాలనే తపనతో వున్నారు. కానీ, వాస్తవ పరిస్థితులు అందుకు అనుకూలంగా ఏమాత్రం లేవు. తెలుగుదేశం పార్టీ ఇప్పుడు అత్యంత పతనావస్థలో వుంది. పార్టీ చరిత్రలోనే కనీ వినీ ఎరుగని సంక్షోభమిది. కరోనా నేపథ్యంలో కేవలం ‘జూమ్’ మీటింగులకి మాత్రమే పరిమితమవ్వాల్సింది చంద్రబాబు. ప్రతిపక్ష నేతగా ప్రజల ముందుకు వెళ్ళాల్సిన బాధ్యతను ఆయన పక్కన పెట్టేశారు. మరోపక్క, పార్టీ శ్రేణులేమో.. నాయకత్వ లేమి కారణంగా అగమ్య గోచరంలో పడిపోయారు. కానీ, చంద్రబాబు మాత్రం ‘రెండేళ్ళలో జమిలి ఎన్నికలు..’ అంటూ కొత్త పల్లవి అందుకున్నారు.

ఒకవేళ ‘జమిలి’ ఎన్నికలంటూ జరిగితే, ఆంధ్రప్రదేశ్‌లో టీడీపీ పరిస్థితేంటి.? చంద్రబాబు మాత్రం, ‘మళ్ళీ మేమే అధికారంలోకి వస్తాం..’ అని చెబుతున్నారు. కానీ, గ్రౌండ్‌ లెవల్‌లో పరిస్థితులు అందుకు భిన్నంగా వున్నాయి. ‘ఈసారి టీడీపీ సున్నా చుట్టేయడం ఖాయం..’ అంటోంది అధికార వైఎస్సార్‌ కాంగ్రెస్‌ పార్టీ. ‘జమిలి ఎన్నికలు జరిగితే చంద్రబాబు తన సొంత నియోజకవర్గం కుప్పంలో గెలవడం కాదు కదా.. కనీసం డిపాజిట్లు కూడా తెచ్చుకోలేరు..’ అంటూ ఓ మంత్రిగారు సెలవిచ్చారు. బహుశా ‘స్థానిక ఎన్నికల్లో లొల్లి చేసినట్లు’ సార్వత్రిక ఎన్నికల్లోనూ అలాగే చేయొచ్చని సదరు మంత్రిగారు భావిస్తున్నారేమో.. ఆ పప్పులు ఏమాత్రం ఉడికే పరిస్థితి వుండదు సాధారణ సార్వత్రిక ఎన్నికల్లో. ఒక్కటి మాత్రం నిజం.. టీడీపీ పరిస్థితి మరీ దయనీయంగా మారుతుంది జమిలి ఎన్నికలంటూ వస్తే. అలాగే అధికార పార్టీకి కూడా చుక్కలు కన్పిస్తాయి జమిలి ఎన్నికల్లో. ఇందులో ఇంకో మాటకు తావు లేదు.

‘ఒక్క ఛాన్స్‌..’ అంటూ అధికారం కోసం దేబిరించిన వైఎస్సార్సీపీ, అధికారంలోకి వచ్చాక.. రాష్ట్రాన్ని అప్పుల ఊబిలోకి నెట్టేసింది మరి. ఇలా ఎలా చూసుకున్నా.. రాష్ట్రంలో రెండు ప్రధాన రాజకీయ పార్టీలకు ‘జమిలి’ ఎన్నికలు దిమ్మతిరిగే షాక్‌ ఇవ్వబోతున్నాయన్నది నిర్వివాదాంశం.