పెదబాబుతోపాటే చినబాబూ జైలుకెళ్ళాల్సిందే.!

ఆంధ్రప్రదేశ్‌లో వైఎస్‌ జగన్‌ మోహన్‌రెడ్డి ప్రభుత్వం కక్ష సాధింపు చర్యలు కాదంటూనే, మంత్రి వర్గ ఉప సంఘాన్ని ఏర్పాటు చేసి గత ప్రభుత్వంలో జరిగిన అవినీతిని వెలికి తీసేందుకు ప్రయత్నిస్తోంది. సరిగ్గా 45 రోజుల్లో ఈ క్యాబినెట్‌ సబ్‌ కమిటీ తన నివేదికని ప్రభుత్వానికి అందిస్తుంది. దాదాపు అన్ని శాఖల్లోనూ అవినీతి జరిగిందని భావిస్తున్న వైఎస్‌ జగన్‌ ప్రభుత్వం, అన్ని శాఖలకు చెందిన అధికారులూ గత ప్రభుత్వ హయాంలో వచ్చిన జీవోలు, ఇచ్చిన టెండర్లు, చేసిన ఖర్చుల వివరాల్ని ఈ క్యాబినెట్‌ సబ్‌ కమిటీకి సవివరంగా వెల్లడించాల్సిందిగా ఆదేశాలు జారీ చేసింది.

పుష్కరాల దగ్గర్నుంచి, పోలవరం ప్రాజెక్టు వరకు.. అన్నిట్లోనూ అవినీతి జరిగిందని చెబుతున్న వైఎస్‌ జగన్‌ ప్రభుత్వం, మంచి నీళ్ళ ప్యాకెట్ల దగ్గర్నుంచి, ఎలుకలు పట్టడం దాకా, సాధారణ ఖర్చుల దగ్గర్నుంచి ప్రాజెక్టు టెండర్లదాకా.. అన్నింట్లోనూ బూతద్దం పెట్టి వెతకబోతోంది. ఎట్టి పరిస్థితుల్లోనూ నిజాలు నిగ్గు తేలతాయని వైఎస్‌ జగన్‌ ప్రభుత్వం గట్టిగా నమ్ముతోంది. ఆ తర్వాత ఎలాగూ, చట్టపరమైన చర్యలుంటాయనుకోండి. అది వేరే సంగతి.

వైఎస్‌ రాజశేఖర్‌రెడ్డి హయాంలో వైఎస్‌ జగన్‌ మోహన్‌ రెడ్డి అడ్డగోలుగా దోచేశారంటూ ఇప్పటికీ తెలుగుదేశం పార్టీ ఆరోపిస్తూనే వుంది. గతంలో టీడీపీ, కాంగ్రెస్‌ చేసిన ఆరోపణలు, తత్ఫలితంగా నమోదైన కేసుల్లో వైఎస్‌ జగన్‌ సహా ఆయనకు అత్యంత సన్నిహితుడైన విజయసాయిరెడ్డి.. ఏ1, ఏ2 నిందితులుగా వున్న విషయం విదితమే. ఇప్పటికీ ఆ కేసల విచారణల్ని జగన్‌, విజయసాయిరెడ్డి ఎదుర్కొంటున్నారు. చంద్రబాబు కుట్ర కారణంగానే తాను జైలుకు వెళ్ళాల్సి వచ్చిందన్నది వైఎస్‌ గట్టి నమ్మకం. ఈ నేపథ్యంలో దెబ్బకు దెబ్బ తీయాలన్న కసితో వైఎస్‌ జగన్‌ వున్నారని వైసీపీ వర్గాల నుంచి సమాచారం అందుతోంది.

చంద్రబాబుపై ఎటూ అవినీతి ఆరోపణలున్నాయి.. ఆయన పుత్రరత్నం సంగతి సరే సరి. ఒకేసారి చంద్రబాబు, ఆయన తనయుడు నారా లోకేష్‌ జైలుకెళ్ళేలా పక్కా స్కెచ్‌ వైసీపీ రెడీ చేసిందంటూ రాజకీయ వర్గాల్లో గుసగుసలు విన్పిస్తున్నాయి. ‘మేం ఎవరి మీదా కక్ష సాధింపు చర్యలు చేపట్టడంలేదు. ప్రజలకు జవాబుదారీతనంగా వుండాలి గనుక.. గత ప్రభుత్వ అవినీతిని వెలికి తీస్తున్నాం. ఆ తర్వాత చట్టం తన పని తాను చేసుకుపోతుంది..’ అని మంత్రులు బుగ్గన రాజేంద్రనాథ్‌ తదితరులు చెబుతున్నారు. అయితే, వైఎస్‌ రాజశేఖర్‌రెడ్డి సైతం చంద్రబాబు మీద చాలా కేసులు పెట్టించారనీ, అవేవీ నిలబడలేదనీ.. ఇప్పుడు జగన్‌ మాత్రం ఏం సాధిస్తారని తెలుగుదేశం పార్టీ ఎద్దేవా చేస్తోంది.