వ్యాక్సిన్ రేటు.. అదిరేట్టు.. ఏంటీ కనికట్టు.?

కరోనా వ్యాక్సిన్, మే 1 నుంచి 18 ఏళ్ళ పైబడిన అందరికీ అందుబాటులోకి రానుంది. అయితే, ప్రస్తుతం ఉచితంగా అందిస్తోన్న వ్యాక్సిన్ 45 ఏళ్ళ పైబడినవారికి ఇప్పటిలానే ఉచితంగా లభిస్తుందిగానీ, 18 నుంచి 45 ఏళ్ళ లోపువారికి మాత్రం, ఉచితం కాదు. ఈ విషయాన్ని ఇటీవలే కేంద్రం వెల్లడించింది కూడా. అందుకు తగ్గట్టే వ్యాక్సిన్ కంపెనీలు, ధరల్ని ప్రకటించడం మొదలు పెట్టాయి. ఒక డోసు వ్యాక్సిన్ కోసం కోవిషీల్డ్ ఇకపై 400 నుంచి 600 రూపాయలు వసూలు చేయనుంది. రాష్ట్ర ప్రభుత్వాలు కొనుగోలు చేస్తే 400 రూపాయలు, అదే ప్రైవేటు ఆసుపత్రులు కొనుగోలు చేస్తే 600 రూపాయలన్నమాట.

ఒక్కసారి వ్యాక్సిన్ ‘ప్రైవేటు మార్కెట్’లోకి వస్తే, ఆ మాఫియా ఎలా వుంటుందో ప్రత్యేకంగా చెప్పాల్సిన పనిలేదు. రెమిడిసివిర్ ఇంజక్షన్ మామూలుగా అయితే 900 రూపాయల ధర నుంచి లభ్యమవ్వాలి. కానీ, అదిప్పుడు 60 వేల రూపాయల వరకు ధర పలుకుతోంది. అంటే, కోవిషీల్డ్ వ్యాక్సిన్ ‘బహిరంగ మార్కెట్’లో ఎంతుంటుందో ఊహించుకోవడం పెద్ద కష్టమేమీ కాదు.

కేంద్ర ప్రభుత్వానికి 250 రూపాయలకే వ్యాక్సిన్ అందించగలుగుతున్నప్పుడు, వ్యాక్సిన్ తయారీ సంస్థలు రాష్ట్ర ప్రభుత్వాలకు ఎందుకు అదే ధరను అందించలేవు.? అక్కడా.. ఇక్కడా ప్రభుత్వమే వ్యాక్సిన్ కొనుగోలు చేస్తున్నప్పుడు ఇంత తేడా ఎందుకు.? ఇదే సామాన్యుడికి అర్థం కాని ప్రశ్న. తెరవెనుక కారణాలు ఏమైనాగానీ, దేశంలో 130 కోట్ల మంది ప్రజలూ ఇప్పుడు వ్యాక్సిన్ పొందాల్సిందే. ఇందులో ఇంకో మాటకు తావు లేదు.

ముందు ముందు 18 ఏళ్ళ లోపువారికీ వ్యాక్సిన్ అందుబాటులోకి వస్తుందని కేంద్రం ప్రకటిస్తుందా.? అన్నది వేరే చర్చ. దేశ ప్రజలందరికీ ఉచితంగా వ్యాక్సిన్ ఇవ్వలేని ప్రభుత్వం వుంటే ఎంత.? ఊడితే ఎంత.? అన్న చర్చ సోషల్ మీడియా వేదికగా జరుగుతోంది. ఒకవేళ కేంద్రం, ఉచితంగా వ్యాక్సిన్ అందించినా.. ఆ భారం మళ్ళీ ప్రజల మీద మోపాలి.. పన్నుల రూపంలోనో, ఇంకో రూపంలోనో.