న్యాయవ్యవస్థపై అవాకులు చెవాకులు: సీబీ‘ఐ’తో జర జాగ్రత్త.!

‘మేం జడ్జిలపై జుగుప్సాకరమైన వ్యాఖ్యలే చేస్తాం. మహా అయితే ఏం చేస్తారు.? అరెస్ట్‌ చేసి, జైలుకి పంపించమని ఆదేశిస్తారేమో. అక్కడ మళ్ళీ ఆ పని చేయాల్సింది మా పోలీసులే కదా.!’ ఇదీ ఓ ‘బ్లూ కాలర్‌’ పెయిడ్‌ ఆర్టిస్ట్‌ సోషల్‌ మీడియా వేదికగా కొన్ని రోజుల క్రితం పెట్టిన పోస్ట్‌ సారాంశం.

ఏకంగా జడ్జిల్ని, కరోనా రోగులున్న గదిలో బంధించెయ్యాలన్నాడు ఓ ‘బ్లూ’ నెటిజన్‌. అధికార పార్టీకి చెందిన కొందరు ప్రజా ప్రతినిథులు సైతం న్యాయస్థానాలపై, న్యాయమూర్తులపై అవాకులు చెవాకులు పేలారు. ఈ నేపథ్యంలో ఉన్నత న్యాయస్థానం సీరియస్‌గా స్పందించింది. కానీ, ఏం లాభం.? జరగాల్సిన స్థాయిలో అరెస్టులు జరగలేదు. ఎంతైనా సీఐడీ అంటే, రాష్ట్ర పరిధిలోనిది.. రాష్ట్రంలోని అధికార పార్టీ అజమాయిషీలో వుండేది కదా.! అందుకేనేమో, అరెస్టులు జరగలేదన్న విమర్శలు వుండనే వున్నాయ్‌.

హైకోర్టు సైతం, ఎందుకు అరెస్టులు జరగలేదు.? అంటూ అసహనం వ్యక్తం చేసింది. చివరికి ఈ వ్యవహారం సీబీఐ వద్దకు చేరింది. సీబీఐ, కేసులు నమోదు చేసింది కూడా.! ఇక, ఇప్పుడు అసలు కథ మొదలు కాబోతోంది. అయితే, ‘బ్లూ కాలర్‌’ పెయిడ్‌ ఆర్టిస్టులు ఇంకా తమ పైత్యం ప్రదర్శిస్తూనే వున్నారు. ‘డాక్టర్‌ సుధాకర్‌ వ్యవహారంలో ఏం జరిగింది.? ఇప్పుడేదో జరిగిపోతుందనే భయమెందుకు మాకు.?’ అంటూ ఇంకా ఇంకా రెచ్చిపోతూనే వున్నారు సోషల్‌ మీడియా వేదికగా.

ముఖ్యమంత్రే స్వయంగా న్యాయ వ్యవస్థపైనా, న్యాయమూర్తులపైనా ఆరోపణలు చేస్తున్నప్పుడు, ఆయన్ని అభినించేవారు వ్యవస్థల పట్ల గౌరవం ఎలా కలిగి వుంటారని రాజకీయ విశ్లేషకులు ప్రశ్నిస్తున్నారు. సీబీఐ కేసులు నమోదయ్యాక కూడా వైసీపీ నేతలు, సోషల్‌ మీడియాలో అవాకులు చెవాకులు పేలుతున్న తమ ‘పెయిడ్‌ బ్యాచ్‌’ని సమర్థిస్తారా.? లేదంటే, ‘మీ ఛావు మీరు ఛావండి..’ అని గాలికొదిలేస్తారా.? ఒకవేళ వదిలేస్తే మాత్రం, పరిస్థితి అత్యంత అధ్వాన్నంగా తయారవుతుంది.