వైఎస్‌ జగన్‌ రివర్స్‌ పాలనపై బీజేపీ కొత్త టర్న్‌.!

‘పుట్టినరోజునాడు శుభాకాంక్షలు చెప్తే.. అప్పటిదాకా చేసిన తప్పుల్ని క్షమించేసినట్లు కావు.. అన్ని పాపాలకూ లెక్కలుంటాయ్‌..’ అంటూ బీజేపీ సీనియర్‌ నేత రాంమాధవ్‌, వైఎస్సార్‌ కాంగ్రెస్‌ ప్రభుత్వంపై చేసిన వ్యాఖ్యలు ఇప్పుడు రాష్ట్ర రాజకీయాల్లో పెను ప్రకంపనలు సృష్టిస్తున్నాయి.

రాష్ట్ర రాజకీయాల్లో బలమైన రాజకీయ పార్టీగా ఎదగడానికి భారతీయ జనతా పార్టీ నానా తంటాలూ పడుతోన్న విషయం విదితమే. ఈ క్రమంలో తొలుత టీడీపీ – జనసేనతో జతకట్టింది, ఆ తర్వాత వైఎస్సార్‌ కాంగ్రెస్‌ పార్టీతో తెరవెనుక లాలూచీలు నడిపిందనే ఆరోపణల్ని ఎదుర్కొంది. ప్రస్తుతం అధికారికంగా బీజేపీ – జనసేన మధ్య పొత్తు నడుస్తోంది. అయితే, జనసేన పార్టీ మాత్రమే బీజేపీని మిత్రపక్షంగా భావిస్తోంది తప్ప, బీజేపీ.. జనసేన పట్ల ఆ అభిప్రాయంతో వున్నట్లు కనిపించడంలేదు.

ఏదన్నా విషయమ్మీద జనసేన పార్టీ, వైసీపీ ప్రభుత్వంపై విమర్శలు చేస్తే, దాన్ని వెంటనే ఖండించేందుకు బీజేపీ నుంచి జీవీఎల్‌ నరసింహారావు లాంటి నేతలు వచ్చేస్తుంటారు. అంతెందుకు, సాక్షాత్తూ బీజేపీ ఏపీ అధ్యక్షుడు కన్నా లక్ష్మినారాయణ వైసీపీని విమర్శించినా, జీవీఎల్‌ తదితర నేతలు.. వైసీపీకి పరోక్ష మద్దతు పలుకుతుండడం చూస్తున్నాం.

కానీ, ఇప్పుడు సీన్‌ మారింది. రాంమాధవ్‌ అంటే, ప్రధాని నరేంద్ర మోడీకి అత్యంత సన్నిహితుడు. మోడీ, అమిత్‌ షాల కనుసన్నల్లోనే రాంమాధవ్‌ వ్వహరిస్తుంటారు. అలాంటి రాంమాధవ్‌, మునుపెన్నడూ లేనంత తీవ్ర స్థాయిలో వైసీపీ మీద విరుచుకుపడ్డారు. వైసీపీ, ఆంధ్రప్రదేశ్‌లో రివర్స్‌ పాలన చేస్తోందని ఎద్దేవా చేశారు. ‘అన్ని తప్పులకీ సమాధానపం చెప్పాల్సిందే..’ అంటూ వైసీపీని నిలదీశారు.

నిజానికి, రాంమాధవ్‌ కారణంగానే జనసేన – బీజేపీ మధ్య పొత్తు కుదిరింది. దాన్ని చెడగొట్టేందుకు జీవీఎల్‌ లాంటి నేతలు ప్రయత్నిస్తున్నారనే విమర్శలు లేకపోలేదు. అసలు వైసీపీ పట్ల అంత సానుకూలంగా వుండడానికి జీవీఎల్‌ లాంటోళ్ళకి వున్న ప్రత్యేక కారణాలేంటో చాలామంది బీజేపీ నేతలకే అర్థం కాని పరిస్థితి. ఇక, కన్నా లక్ష్మినారాయణపై వీలు చిక్కితే విరుచుకుపడిపోయే వైసీపీ ఎంపీ విజయసాయిరెడ్డి, రాంమాధవ్‌ విమర్శలపై పెదవి విప్పే సాహసం చేస్తారా.? అన్నది ప్రస్తుతానికి సస్పెన్సే.