బిగ్ బాస్ 4: ఎపిసోడ్ 71 – మెహబూబ్‌ ఎలిమినేషన్‌.. అందరి కంట కన్నీరు.!

బిగ్‌ బాస్ నుండి మరో కంటెస్టెంట్‌ బయటకు వెళ్లి పోయాడు. మొదటి రెండు మూడు వారాల్లోనే ఈయన ఎలిమినేట్‌ అవుతాడు అంటూ అంతా అనుకున్నారు. కాని అనూహ్యంగా మెహబూబ్‌ కు లక్‌ కలిసి వచ్చింది. మొదట్లో ఇతడు ఉండటం అవసరమా అని అంతా అనుకున్నారు. కాని వెళ్లే ముందు మాత్రం ప్రేక్షకులు అతడి ఎలిమినేషన్‌ సరి కాదని ఓట్లు వేసినా కూడా ఎలిమినేట్‌ చేశారంటూ అసహనం వ్యక్తం చేశారు. మెహబూబ్‌ దిల్‌ సే నిజంగా మంచి కంటెస్టెంట్‌, బాగా కష్టపడ్డాడు. ప్రతి విషయంలో నూరు శాతం ఇచ్చేందుకు ప్రయత్నించాడు. డాన్స్‌ లో విషయంలో హౌస్‌ లోనే టాప్‌ లో కొనసాగాడు. అలాంటి మెహబూబ్‌ ఎలిమినేట్‌ అవ్వడంతో ఇంటి సభ్యులు అంతా కూడా కంట కన్నీరు పెట్టుకున్నారు.

సండే ఫన్‌ డే అన్నట్లుగానే 71 ఎపిసోడ్‌ సరదాగా సాగింది. మొదట ఇంటి సభ్యులతో గద్ద కుందేలు ఆటను ఆడించిన నాగార్జున ఆ తర్వాత సినిమా టైటిల్‌ లను గెస్‌ చేసేందుకు డ్రాయింగ్‌ టెస్ట్‌ పెట్టాడు. సందడి సందడిగా సాగిన ఫన్‌ టాస్క్‌ లో డాన్స్‌ లతో కూడా అదరగొట్టారు. ఇక నాగార్జున ఒకొక్కరిని చొప్పున సేవ్‌ చేస్తూ వచ్చాడు. చివరకు మెహబూబ్‌ మరియు సోహెల్‌ లు మిగిలి పోవడంతో అందరిలో ఉత్కంఠను రేకెత్తించింది. మెహబూబ్‌ ఎలిమినేట్‌ అయినట్లుగా నాగార్జున ప్రకటించిన వెంటనే సోహెల్‌ చాలా ఏడ్చాడు. నా కంటే వీడు స్ట్రాంగ్‌ వీడిని ఎలా పంపిస్తారు అంటూ ఆవేదన వ్యక్తం చేశాడు.

గత సీజన్‌ లలో కంటెస్టెంట్స్‌ ఏడుస్తుంటే ఎందుకు వీళ్లు ఇంతగా ఏడుస్తున్నారు అనుకున్నాను. కాని నాకు ఇప్పుడు అర్థం అవుతుంది అంటూ సోహెల్‌ అన్న మాటలు ప్రతి ఒక్కరిని కదిలించాయి. మెహబూబ్‌ వెళ్లి పోతు ఉన్నాడు అంటే ఎప్పుడు గంభీర్యంగా కనిపించే అభిజిత్‌ కూడా కంట కన్నీరు పెట్టాడు. మెహబూబ్‌ మరియు అభిజిత్‌ ల మద్య ఎక్కువ ర్యాపో ఉన్నట్లుగా చూపించలేదు. కాని వెళ్లే ముందు అభిజిత్‌ గురించి మెహబూబ్‌ చేసిన వ్యాఖ్యలు వారిద్దరి మద్య ఎంతగా బాండింగ్‌ ఉందో చెప్పకనే చెబుతోంది. అందరికి మంచి చెప్పి అక్కడ నుండి వెళ్లి పోయాడు. సోహెల్‌ గురించి మాట్లాడే సమయంలో మెహబూబ్‌ కింద పడి మరీ ఏడ్చాడు.