ఈఎస్‌ఐ మెడికల్‌ స్కామ్: కస్టడీ విచారణలో అచ్చెన్న ఏం చెప్పినట్లు.?

మాజీ మంత్రి, టీడీపీ సీనియర్‌ నేత, ఎమ్మెల్యే కింజరాపు అచ్చెన్నాయుడిని ఈఎస్‌ఐ మెడికల్‌ స్కామ్ లో ఏ2 నిందితుడిగా చూపిస్తూ అరెస్ట్‌ చేసిన ఏసీబీ, ఆయన్ను మూడు రోజులపాటు విచారించింది. అనారోగ్యం నేపథ్యంలో ప్రస్తుతం ఆయన గుంటూరు ప్రభుత్వాసుపత్రిలో వైద్య చికిత్స పొందుతుండగా, అక్కడే ఆయన్ని ‘కస్టడీలోకి తీసుకుని’ విచారణ చేపట్టింది ఏసీబీ. అయితే, మూడు రోజుల కస్టడీ విచారణలో అచ్చెన్నాయుడు నుంచి ఎలాంటి సమాధానాల్నీ ఏసీబీ రాబట్టలేకపోయిందట. ఈ విషయాన్ని స్వయానా అధికార పార్టీకి చెందిన మీడియా సంస్థ తేల్చి పారేసింది. ఇది ఈ రోజు అప్‌డేట్‌.

కానీ.. ఇంతకు ముందు ఇదే మీడియాలో ‘విచారణలో కీలక విషయాలు రాబడ్తున్న ఏసీబీ..’ అంటూ ఇదే వైసీపీ అనుకూల మీడియాలో కథనాలు పుంఖానుపుంఖాలుగా దర్శనమిచ్చాయి. అచ్చెన్న విషయంలో ఏసీబీ ఎలాంటి ప్రశ్నలు సంధించింది.? ఎలాంటి సమాధానాలు రప్పించింది.? అన్న విషయాలపై స్పష్టత ఇవ్వాల్సింది ఏసీబీనే. విచారణ అనంతరం ఆ వివరాల్ని ఏసీబీ, న్యాయస్థానం ముందుంచుతుంది. కానీ, ఈలోగా వైసీపీ అనుకూల మీడియా చెయ్యాల్సినదానికంటే పదింతలు ఎక్కువ రాద్ధాంతం చేసేస్తోంది. సాధారణంగా ఇలాంటి కేసుల్లో అరెస్టులు, విచారణలు.. ఆ తర్వాత బెయిల్‌ రావడం, రాకపోవడం.. ఇదంతా ఓ ప్రసహనం. వైఎస్‌ జగన్‌ అక్రమాస్తుల కేసులో ఏం జరిగిందో చూశాం. చాలా కేసుల్లో ఏం జరుగుతోందో చూస్తున్నాం. అచ్చెన్నాయుడు విషయంలో ఏం జరుగుతుందన్నది ముందు ముందు కాలమే సమాధానం చెప్పాలి.

అయితే, రాజకీయంగా అచ్చెన్నాయుడికి ఈ ఎపిసోడ్‌ అనూహ్యమైన పాపులారిటీ తెచ్చిపెట్టిందన్నది నిర్వివాదాంశం. 2019 ఎన్నికల్లో అచ్చెన్నాయుడు ‘చావు తప్పి కన్ను లొట్టపోయిన’ చందాన బొటాబొటి మెజార్టీతో గెలిచారు. కానీ, ఇప్పుడు ఆయన సొంత నియోజకవర్గంలో పరిస్థితి వేరు. అచ్చెన్నాయుడి మీద విపరీతమైన సింపతీ క్రియేట్‌ అయ్యింది. అందుక్కారణం.. అచ్చెన్న అరెస్ట్‌ చుట్టూ టీడీపీ చేసిన పబ్లిసిటీ స్టంట్స్‌తోపాటు, వైసీపీ చేసిన యాగీ కూడా. ఈఎస్‌ఐ మెడికల్‌ స్కామ్ లో అచ్చెన్నకు పాత్ర వుంటే ఆయనకు శిక్ష పడాల్సిందే. కానీ, అది తేలేదెప్పుడు.? ఈలోగా ‘క్యారెక్టర్‌ అసాసినేషన్‌’ మాత్రం చేసెయ్యాలని వైసీపీ, దాని అనుకూల మీడియా తెగ ప్రయత్నించాయి.. మరి, ఫలితం వచ్చిందంటారా.?