ఎట్టకేలకు ఏపీ-తెలంగాణ మధ్య కుదిరిన ఒప్పందం..

ఎట్టకేలకు సందిగ్ధం వీడింది. ఏపీ, తెలంగాణ మధ్య ఆర్టీసీ సర్వీసులు ఆరోజు రాత్రి నుంచే రైట్.. రైట్ అనబోతున్నాయి. కరోనా, లాక్ డౌన్ కారణంగా మూసుకుపోయిన సరిహద్దులు తెరుచుకున్నా.. రూట్లు, కిలోమీటర్ల ప్రాతిపదికన ఆర్టీసీ సర్వీసులు ఆగిపోయాయి. దీంతో రెండు రాష్ట్రాల్లోని ప్రయాణికులు ఇబ్బందులు పడ్డారు. తెలంగాణ పట్టిన పట్టు విడువకపోవడంతో ఏపీ తలొగ్గి వారి డిమాండ్లు అంగీకరించింది. దీంతో ఏపీ, తెలంగాణ మధ్య ఆర్టీసీ రవాణా వ్యవస్థ గాడినపడుతోంది.

ఈమేరకే ఏపీ, తెలంగాణ ఆర్టీసీల మధ్య అవగాహన ఒప్పందం కుదిరింది. ఏపీలో 1,61,258 కి.మీ. తిప్పేందుకు తెలంగాణ ఆర్టీసీ నిర్ణయించింది. తెలంగాణలో 1,60,999 కి.మీ. తిప్పేందుకు ఏపీఎస్ఆర్టీసీ సన్నద్ధమైంది. దీంతో ఏపీలో 826 తెలంగాణ బస్సులు తిరగబోతూండగా.. తెలంగాణలో 638 ఏపీఎస్ఆర్టీసీ బస్సులు తిరగబోతున్నాయి. లాక్‌డౌన్ కు ముందు ఏపీ బస్సులు తెలంగాణలో 2,65,367 కిలోమీటర్లు తిప్పింది. ప్రస్తుత ప్రతిపాదనలతో లక్షకు పైగా కిలోమీటర్లలో కోతపడనుంది. విజయవాడ-హైదరాబాద్ మార్గంలో ఇప్పటి వరకు ఏపీ నడిపిన 374 బస్సులను 192కి తగ్గించుకున్నట్టు తెలుస్తోంది. ఇదే రూట్ లో తెలంగాణ ఇప్పటివరకూ నడిపిన 162 బస్సులను 273కి పెంచుకున్నట్టు సమాచారం. రెండు తెలుగు రాష్ట్రాల ప్రయాణికుల ఇబ్బందుల దృష్ట్యా ఏపీ వెనక్కు తగ్గినట్టు అధికారులు స్పష్టం చేస్తున్నారు.

దీనిపై తెలంగాణ మంత్రి పువ్వాడ అజయ్ కుమార్ స్పందించారు. ‘ఇప్పటివరకూ ఉమ్మడి రాష్ట్ర నిబంధనల ప్రకారమే బస్సులు నడిచాయి. కరోనా వల్లనే ఇంటర్ స్టేట్ అగ్రిమెంట్ లేదని తెలిసింది. ఇప్పుడు ఆ ప్రాతిపదిక మీదే బస్సులు నడుపుతాం. ఈరోజు రాత్రి నుంచే బస్సులు నడుస్తాయి. ఈ ఒప్పందం వల్ల ఏపీకి లాభమే. ఏపీ రవాణ శాఖ మంత్రికి అభినందనలు’ అన్నారు.