ఇంట్లో ‘వివాహేతర సంబంధాలు.. రెండు పెళ్లిళ్లు..?’ ఇవేం ప్రశ్నలంటూ విమర్శలు

వాలంటీర్లతో కలిసి మహిళా పోలీసులు తమ పరిధిలోని ఇళ్లకు వెళ్లి ప్రజలను అడుగుతున్న ప్రశ్నలపై తీవ్ర అభ్యంతరాలు వ్యక్తమవుతున్నాయి. ‘మీ ఇంట్లో వివాహేతర సంబంధాలు ఉన్నాయా..? లైంగిక సంబంధాలు కొనసాగిస్తున్నారా..? ఒకటి కంటే ఎక్కువ పెళ్లిళ్లు చేసుకున్నారా..?’ వంటి ప్రశ్నలు విమర్శలకు తావిస్తున్నాయి. ‘నేరాలకు తావిచ్చే పాత విరోధాల వివరాల సేకరణ’ పేరుతో ఏపీ పోలీసు శాఖ ఇంటింటికీ వెళ్లి ఇబ్బందికర ప్రశ్నలు వేయడం సర్వత్రా చర్చనీయాంశం అవుతోంది.

కొందరు మహిళా పోలీసులు ఈ ప్రశ్నలడిగేందుకు ఇబ్బంది పడుతుంటే.. కొందరు ప్రజల నుంచి తీవ్ర ప్రతిఘటన ఎదురవుతోంది. వీటితోపాటు గృహ హింస, ఆస్తి, సరిహద్దు వివాదాలు, పాత కేసులు, మద్యం, ఈవ్ టీజింగ్, కుల, మత విరోధాలు వంటి సున్నిత అంశాలపై ప్రశ్నలు అడిగి వివరాలు రాబడుతున్నారు.

ఎన్నికల్లో ఈ వివరాలు ఆధారంగా బెదిరింపులు పాల్పడేందుకు.. రాజకీయ ప్రత్యర్ధులు, ఇతర పార్టీ సానుభూతిపరులను వేధించి కేసుల్లో ఇరికించేందుకే పోలీసు శాఖ ఈ వివరాలు సేకరిస్తోందని ప్రతిపక్ష నాయకులు ఆరోపిస్తున్నారు.