రాజధాని రాష్ట్ర ప్రజలందరిదీ.. ‘బులుగు తిక్క’ కుదిరిందీ.!

చంద్రబాబు హయాంలో అమరావతి పేరుతో ‘కొందరు లాభపడ్డారు’ అనేది వాస్తవమైతే, ఆ కొందరి ముక్కు పిండి, అక్రమంగా వాళ్ళు దోచేసినదంతా కక్కించాల్సిన బాధ్యత ప్రస్తుత వైఎస్ జగన్ మోహన్ రెడ్డి ప్రభుత్వం మీద వుంది తప్ప, రాష్ట్ర ప్రజలందరికీ చెందాల్సిన అమరావతి మీద ‘కమ్మ’ ముద్ర వేసేసి, రాజకీయం చేయడమేంటి.?

బులుగు పైత్యానికి న్యాయస్థానంలో చుక్కెదురయ్యింది. రాజధాని అంటే, రాజధాని కోసం భూములిచ్చిన రైతులది మాత్రమే కాదు.. రాష్ట్ర ప్రజలందరిదీ. విశాఖపట్నం నుంచి కర్నూలు దాకా.. రాష్ట్రంలో ప్రతి ఒక్కరిదీ రాజధాని అమరావతి.. అంటూ ఏకంగా హైకోర్టు ప్రధాన న్యాయమూర్తి ప్రశాంత్ కుమార్ మిశ్రా వ్యాఖ్యానించారు.

నిజానికి, ఎవరైనా ఇదే మాట చెబుతారు, చెప్పాలి కూడా. రాజధాని వేరు, రాజకీయం వేరు. దుర్మార్గమైన విషయమేంటంటే, రాజధానిలో రాజకీయాన్ని కలిపేసి, రాజధానిని సర్వనాశనం చేసే రాజకీయ కుట్రకి తెరలేపింది బులుగు పైత్యం.

చంద్రబాబు, నారాయణ.. ఇలా పలువురు పేర్లు రాజధాని కుంభకోణంలో వినిపించాయి. కానీ, రెండున్నరేళ్ళలో ఏ ఒక్క టీడీపీ నేత మీద కూడా ‘దోషులు’ అన్న ముద్రని న్యాయవ్యవస్థ ద్వారా వేయించలేకపోయింది వైఎస్ జగన్ ప్రభుత్వం. ఇక్కడే తేలిపోయింది, అమరావతి పేరుతో వైసీపీ చేసిన ఆరోపణల్లో వాస్తవం ఏమాత్రం లేదని.

సరే, అమరావతిని రాజధానిని చేసే క్రమంలో తెరవెనుకాల టీడీపీ ఆడిన నాటకం, తద్వారా లాభపడిన ఓ సామాజిక వర్గం.. ఇదంతా వేరే చర్చ. ఆ ‘లాభపడిన వ్యవహారం’పై లోతైన విచారణల్లేవు.. గట్టి చర్యలు అసలే లేవు. అంతా హంబక్. కేవలం, రాజకీయ ఆరోపణలకే పరిమితమయ్యారు ప్రస్తుత పాలకులు. అక్కడే అసలు సమస్య వచ్చిపడింది.

చూస్తోంటే, రాజధానిపై ‘కమ్మ’ ముద్ర వేయడంలో చంద్రబాబు ఎంత విజయం సాధించారో, ఆ ముద్రని ఇంకా బలంగా వేయడంలో వైసీపీ ఇంకా పెద్ద విజయం సాధించిందని అనుకోవాలేమో. ఇద్దరూ కలిసి ఆడిన 60-40 డ్రామా నడుమ, అమరావతి నష్టపోయింది.. ఆంధ్రప్రదేశ్ నష్టపోయింది.