ఇజ్రాయెల్ కి ఆ విధానం లేనందునే డబ్బులిచ్చాం

ఆంధ్రప్రదేశ్ ముఖ్యమంత్రి వైఎస్ జగన్ మోహర్ రెడ్డి జెరూసలెం పర్యటన విషయంలో విపక్షాల నుంచి వస్తున్న విమర్శలపై ఏపీ సర్కారు వివరణ ఇచ్చింది. జగన్ ఇజ్రాయెల్ పర్యటనకు మొత్తం ఖర్చులన్నీ ఆయనే సొంతంగా వెచ్చిస్తున్నారని.. కానీ ముఖ్యమంత్రిగా ఆయన భద్రత బాధ్యత ప్రభుత్వానిదే కావడంతో ఆ మేరకే సర్కారు ఏర్పాట్లు చేసిందని పేర్కొంది.

ఏపీ అసెంబ్లీ ఎన్నికల్లో తిరుగులేని మెజార్టీతో విజయం సాధించిన నేపథ్యంలో జెరూసలెం వెళ్లి ప్రార్థనలు చేసి రావాలని జగన్ నిర్ణయించుకున్నారు. ఈ నేపథ్యంలో కుటుంబ సభ్యులతో కలిసి గురువారం ఇజ్రాయెల్ రాజధాని జెరూసలెం పయనమయ్యారు. ఈ పర్యటన పూర్తిగా జగన్ వ్యక్తిగతమని, ఇందుకు అయ్యే ప్రతి పైసా ఆయనే ఖర్చు పెట్టుకుంటారని ముందుగానే వైఎస్సార్ సీపీ నేతలు స్పష్టంచేశారు.

అయితే, ఈనెల 31న సాయంత్రం ఇజ్రాయెల్ లో జగన్ భద్రతా ఏర్పాట్ల కోసం రూ.22.50 లక్షల మొత్తాన్ని విడుదల చేస్తూ ప్రభుత్వం ఉత్తర్వులు జారీచేసింది. ఈ మొత్తాన్ని హైదరాబాద్ కు చెందిన ఎయిర్ ట్రావెల్స్ ఇండియా ప్రైవేటు లిమిటెడ్ ద్వారా ట్రిపుల్ ఎస్ టూర్స్ అండ్ ట్రావెల్స్ కి చెల్లిస్తున్నట్టు అందులో పేర్కొన్నారు. దీంతో ఇందులో ఏదో మతలబు ఉందని విపక్షాలు ఆరోపణలు చేశాయి. భద్రతా ఏర్పాట్ల కోసం సెక్యూరిటీ సంస్థలకు కాకుండా ట్రావెల్స్ సంస్థలకు చెల్లించడం ఏమిటని ప్రశ్నించాయి. ఈ విషయంలో బీజేపీ నేతలు మరీ అత్యుత్సాహం ప్రదర్శించి జగన్ పై తీవ్ర ఆరోపణలు చేశారు. దీంతో ప్రభుత్వం వివరణ ఇచ్చింది.

జెడ్ కేటగిరీ భద్రత ఉన్నవారు, రాష్ట్ర ప్రభుత్వ అధినేతలు ఏ దేశానికి వెళ్లినా వారి భద్రతను అక్కడి ప్రభుత్వాలే చూసుకుంటాయి. ఇందుకు సంబంధించి అన్ని దేశాలకూ విధానం ఉంది. అయితే, ఇజ్రాయెల్ మాత్రం ఇలాంటి విధానం పెట్టుకోలేదు. ఏ దేశం నుంచి నేతలు వచ్చినా.. వారి భద్రత బాధ్యతను ఆయా ప్రభుత్వాలే చూసుకోవాలి. ఈ నేపథ్యంలోనే ముఖ్యమంత్రి భద్రత భాద్యత ప్రభుత్వానిదే కావడంతో ఆ మేరకు అవసరమైన నిధులు విడుదల చేసినట్టు ప్రభుత్వం పేర్కొంది.