అరిష్టం.. అంతర్వేది రధం దగ్ధం.. ఎవరిదీ పాపం.!

రాష్ట్రంలో ప్రముఖ దేవాలయాల్లో అదీ ఒకటి. పైగా, లక్ష్మీనరసింహస్వామి దేవస్థానం. ఆ నరసింహుడి రధం తగలబడిపోయింది. దాంతో, ‘ఇది రాష్ట్రానికే కాదు, దేశానికీ.. ప్రపంచానికీ అరిష్టం..’ అంటున్నారు భక్తులు. ఆరు దశాబ్దాల చరిత్ర వున్న ఆ రధం ఎలా ఎందుకు తగలబడిపోయింది.? అన్నది తేలాల్సి వుంది.

తూర్పుగోదావరి జిల్లా అంతర్వేదిలో జరిగిన ఈ ఘటనపై ప్రభుత్వ పెద్దలు స్పందించారు. తీవ్రంగా ఖండించేశారు. బాధ్యులపై చర్యలు తీసుకుంటామంటున్నారు. ఓ పక్క తెలంగాణలో యాదగిరిగుట్ట నరసింహస్వామి దేవస్థానాన్ని దేశంలోనే అతి పెద్ద పుణ్యక్షేత్రాల్లో ఒకటిగా తీర్చిదిద్దేందుకోసం తెలంగాణ ప్రభుత్వం ప్రయత్నిస్తోంటే, ఆంధ్రప్రదేశ్‌లో మాత్రం అందుకు భిన్నమైన పరిస్థితులు కనిపిస్తున్నాయి.

సింహాచలం దేవస్థానం చుట్టూ రోజుకో వివాదం తెరపైకొస్తోంది. టీటీడీ సంగతి సరే సరి. బెజవాడ కనకదుర్గమ్మ దేవాలయం విషయంలో వివాదాల సంగతి కొత్తగా చెప్పేదేముంది.? ఇప్పుడేమో ఏకంగా ఓ ప్రముఖ దేవాలయానికి చెందిన రధం తగలబడటమంటే చిన్న విషయం కాదు. వివిధ రాజకీయ పార్టీలకు చెందిన మద్దతుదారులు సోషల్‌ మీడియా వేదికగా అంతర్వేది రధం తగలబడటంపై భిన్న వాదనలు విన్పిస్తున్నారు. ఆరోపణలు, ప్రత్యారోపణల పర్వం నడుస్తోంది. ఆరు నెలలుగా సీసీ కెమెరా పనిచేయడంలేదని భక్తులు మొత్తుకుంటున్నా, దేవస్థాన అధికారులు స్పందించలేదన్న వాదనలు తెరపైకొస్తున్నాయి.

స్థానికంగా ఎవరైనా ఆకతాయిలు ఈ ఘాతుకానికి పాల్పడ్డారా.? ప్రమాదవశాత్తూ ఈ ఘటన జరిగిందా.? అన్నదానిపైనా రకరకాల కథనాలు విన్పిస్తున్నాయి. ‘పనిగట్టుకుని హిందూ మతంపై కొందరు దాడి చేస్తున్నారు..’ అనే వాదన కూడా తెరపైకొస్తోంది. దేవస్థానాల పాలక మండళ్ళను నియమించే క్రమంలో రాజకీయ నిరుద్యోగులకు పునరావాసం కల్పించడానికి ప్రభుత్వ పెద్దలు అత్యుత్సాహం చూపుతున్నారు తప్ప, హిందూ దేవాలయాలకు రక్షణ లేకుండా పోయిందన్న వాదనలు గతంలోనూ విన్పించాయి.. ఇప్పుడు మరింత ఎక్కువగా విన్పిస్తున్నాయి. ఇది కోట్లాదిమంది హిందువుల మనోభావాలకు సంబంధించిన విషయం. అత్యంత సున్నితమైన విషయం కూడా. వీలైనంత త్వరగా ఈ ఘటనలో నిజాలు నిగ్గుతేల్చాల్సిన బాధ్యత ప్రభుత్వానిదే.