రఘురామ బాటలో ఆనం.! లిస్టులో తర్వాతి పేర్లు ఎవరివి.?

వైసీపీ నుంచి నర్సాపురం ఎంపీ రఘురామకృష్ణరాజు ఏనాడో ‘అనధికారికంగా’ ఔట్ అయిపోయారు. ఈ లిస్టులోకి తాజాగా మాజీ మంత్రి, ఎమ్మెల్యే ఆనం రామనారాయణరెడ్డి పేరు చేరుతోంది. నిజానికి, గతంలోనే ఆయన వైసీపీని వీడతారనే ప్రచారం జరిగినా, ఆయన ఆచి తూచి వ్యవహరిస్తున్నారు.

‘నర్సాపురం ఎక్స్‌ప్రెస్ నెల్లూరు మీదుగా ఢిల్లీకి వెళుతోంది.. ఈ క్రమంలో చాలామంది ప్రయాణీకులు ఆ రైలెక్కేందుకు కాషాయ తీర్థం పుచ్చుకునేందుకు సిద్ధంగా వున్నారు..’ అంటూ కొద్ది నెలల క్రితం ప్రచారం జరిగిన విషయం విదితమే.

జిల్లాల విభజన అంశాన్ని ఆయుధంగా మలచుకుని ఆనం రామనారాయణరెడ్డి సొంత పార్టీపై తిరుగుబాటు బావుటా ఎగురవేశారు. షరామామూలుగానే అధికార వైసీపీ, తమ ఎమ్మెల్యే మీదనే ‘ఎదురుదాడికి’ దిగుతోందనుకోండి.. అది వేరే సంగతి.

కాగా, ఆనం రామనారాయణరెడ్డి ఒకప్పుడు నిబద్ధత కలిగిన రాజకీయ నాయకుడేగానీ, గత కొంతకాలంగా ఆయన రాజకీయంగా తీసుకుంటున్న నిర్ణయాలు ఆయన అభిమానుల్నే గందరగోళంలో పడేస్తున్నాయి. ఇప్పూడు కూడా ఆనం విషయంలో ఎలా స్పందించాలో ఆయన అనుచరులకు అర్థం కావడంలేదు.

ఇదిలా వుంటే, ఆనం రామనారాయణరెడ్డితో బీజేపీ నేతలు టచ్‌లోకి వెళ్ళారట. బీజేపీలోకి ఆయన్ని ఆహ్వానించారట కూడా. అదే సమయంలో, పాత స్నేహంతో తెలుగుదేశం పార్టీ నేతలు కూడా ఆనం రామనారాయణరెడ్డిని తమవైపుకు తిప్పుకునేందుకు ప్రయత్నిస్తునట్లు తెలుస్తోంది.

రెండున్నరేళ్ళ తర్వాత మంత్రి వర్గ విస్తరణ వుంటుందనీ, దాదాపు క్యాబినెట్ అంతా మారిపోతుందనీ ముఖ్యమంత్రి అవుతూనే పార్టీ నేతలకు భరోసా ఇచ్చిన వైఎస్ జగన్ మోహన్ రెడ్డి, రెండున్నరేళ్ళు పూర్తయిపోయినా.. ఆ దిశగా కీలక నిర్ణయం తీసుకోలేదు.

దాంతో, మంత్రి పదవులపై ఆశపడ్డ నేతలు, మంత్రి పదవులు రావనే గట్టి నమ్మకం ఏర్పరచుకున్న నేతలు.. వైసీపీని వీడేందుకు సిద్ధమవుతున్నారు. లిస్టు తీస్తే డజన్ల సంఖ్యలో పేర్లు కనబడతాయంటున్నారు. మార్చి తర్వాత ఆనం సహా పలువురు వైసీపీ ముఖ్య నేతలు, తమ సొంతదారి చూసుకోబోతున్నారనీ, అందులో కొందరు మంత్రులు కూడా వున్నారనే ప్రచారం జరుగుతున్న దరిమిలా, ఈ ప్రచారంలో నిజమెంతో తెలియాలంటే కొద్ది రోజులు ఆగాల్సిందే.