ప్రభుత్వం సరిగ్గా పని చేస్తే.. పరిశ్రమల్లో ప్రమాదాలెందుకు జరుగుతాయ్.?

ఎల్జీ పాలిమర్స్ గ్యాస్ లీక్.! ఆంధ్రప్రదేశ్ రాష్ట్ర ప్రజలు ఎప్పటికీ మర్చిపోలేని పారిశ్రామిక ప్రమాదమిది.! ప్రమాదకర విష వాయువులు గాల్లో కలిసి.. జనం పిట్టల్లా రాలిపోయారు. కనీ వినీ ఎరుగని విషాదమది. మృతులు కుటుంబాలకు కోటి రూపాయల ఎక్స్‌గ్రేషియా.. అంటూ ప్రభుత్వం ప్రకటించింది. ‘మళ్ళీ ఇలాంటి ప్రమాదం ఇంకోటి జరగనివ్వబోం..’ అంటూ ప్రభుత్వ పెద్దలు చాలా గట్టిగా చెప్పేశారు.

కానీ, ప్రమాదాలు అడపా దడపా జరుగుతూనే వున్నాయ్.. ఆయా పరిశ్రమల్లో కార్మికులు ప్రాణాలు కోల్పోతూనే వున్నారు. తాజాగా ఏలూరు జిల్లాలో ఓ పరిశ్రమలో పేలుడు సంభవించింది.. పలువురు ప్రాణాలు కోల్పోయారు. ఈసారి ప్రభుత్వం ప్రకటించిన పరిహారం మృతుల కుటుంబాలకు పాతిక లక్షల చొప్పున కావడం గమనార్హం.

అక్కడ ఎల్జీ పాలిమర్స్ ప్రమాదంలో కోల్పోయిన ప్రాణానికి విలువ ‘కోటి’గా తేల్చిన ప్రభుత్వం, ఇక్కడ ఏలూరు జిల్లాలో జరిగిన ప్రమాదంలో కోల్పోయిన ప్రాణానికి ‘పాతిక లక్షలుగా’ ఎలా లెక్కగట్టింది.? ఇదే అంశంపై ఇప్పుడు బాధిత కుటుంబాల నుంచే కాదు, సామాన్యుల నుంచీ ప్రభుత్వంపైకి ప్రశ్నాస్త్రాలు దూసుకెళుతున్నాయి.

పరిశ్రమల్లో ప్రమాదాలనేవి చెప్పి జరగవు. కానీ, చాలావరకు ప్రమాదాలు నిర్లక్ష్యం కారణంగానే జరుగుతాయి. ఆ ప్రమాదాల నివారణ కోసమే బోల్డంత యంత్రాంగం వుంటుంది. పొల్యూషన్ బోర్డ్ సహా వివిధ శాఖలు.. పరిశ్రమలపై నిరంతర నిఘా పెట్టాల్సి వుంటుంది. ప్రభుత్వం సక్రమంగా పని చేస్తే.. అసలు ఇలాంటి ప్రమాదాలకు ఆస్కారమే వుండదు.

పరిశ్రమలపై రాజకీయ పెత్తనాలు పెరిగిపోవడం.. పరిశ్రమలు నడిపేవారిని రాజకీయ ప్రలోభాలకు గురిచేయడం.. ఇదంతా చాలా పెద్ద కథ. ఎవరు అధికారంలో వున్నా ఈ తంతు నడుస్తూనే వుంటుంది. ప్రమాదం జరిగాక.. చావులకి రేటు కట్టే ప్రభుత్వాలు, ప్రమాదాలు జరగకుండా ఎందుకు చర్యలు తీసుకోలేకపోతున్నాయన్నది మిలియన్ డాలర్ల ప్రశ్న.

ఎక్స్‌గ్రేషియా ప్రకటన కూడా ఓ రాజకీయం అయిపోయింది. ఈ ఓటు బ్యాంకు రాజకీయాలే.. వ్యవస్థల్ని నాశనం చేస్తున్నాయి.