రఘురామకి వున్న తెగువ.. ఏపీకి చెందిన ఆ ఎంపీలలో లేదేం.?

‘సెక్షన్ 124’ ఎ రద్దు కోసం రాష్ట్రాలు తమవంతు ప్రయత్నం చేయాలంటూ వైసీపీ రెబల్ ఎంపీ రఘురామకృష్ణరాజు ఇప్పటికే పలు రాష్ట్రాల ముఖ్యమంత్రులకు లేఖ రాసిన విషయం విదితమే. ఓ ఎంపీ, దేశంలోని వివిధ రాష్ట్రాల ముఖ్యమంత్రుల్ని ఒక్కతాటిపైకి తెచ్చేందుకు ప్రయత్నించడం దేశంలోనే చాలా అరుదైన సందర్భం అనుకోవాలేమో.

సరే, ఆయన మీద ఇదే సెక్షన్ కింద రాజద్రోహం పేరుతో అభియోగాలు మోపబడిన దరిమిలా, ఆ కేసులో అరెస్టయి, పోలీసుల నుంచి థర్డ్ డిగ్రీ టార్చర్ ఎదుర్కొన్నందున (అని ఆరోపిస్తున్నారు రఘురామ).. ఆ కేసు తాలూకు తీవ్రతనెరిగి, తన కష్టం ఇంకెవరికీ రాకూడదని రఘురామ ఈ ప్రయత్నం చేస్తుండొచ్చు. అయినాగానీ, ఇది ఓ గొప్ప ప్రయత్నం. ఇందులో ఇంకో మాటకు తావు లేదు.

దేశవ్యాప్తంగా వున్న ఎంపీలందరికీ ఈ విషయాన్ని రఘురామ తెలియజేస్తున్నారు.. తనతో కలిసి ముందుకు రావాలనుకుంటున్నారు. వ్యక్తిగత హోదాలో, ఓ ఎంపీగా తనకున్న అవకాశాల్ని రఘురామ సద్వినియోగం చేసుకుంటున్న తీరు అందర్నీ ఆశ్చర్యపరుస్తోంది. మరి, వైసీపీకి చెందిన మిగతా ఎంపీలు ఏం చేస్తున్నారు.? రాష్ట్రానికి న్యాయంగా దక్కాల్సిన ప్రత్యేక హోదా, ప్రత్యేక ప్యాకేజీ, రైల్వే జోన్, కడప స్టీలు ప్లాంటు, దుగరాజపట్నం పోర్టు.. ఇలాంటివాటి విషయమై ఏనాడైనా కేంద్రాన్ని వైసీపీ ఎంపీలు నిలదీయాల్సిన స్థాయిలో నిలదీశారా.? రాష్ట్రానికి జరిగిన అంశంపై దేశవ్యాప్తంగా చర్చ జరిగేలా గట్టిగా నిలబడ్డారా.?

తమ పార్టీకి వ్యతిరేకంగా మాట్లాడుతున్నారు కాబట్టి, రఘురామ మీద చర్యలు తీసుకోవాలంటూ ప్రత్యేక విమానంలో ఢిల్లీకి వెళ్ళగలరు.. అవసరమైతే ఇంకోసారి కూడా వెళ్ళడానికి సిద్ధమే. అంతకంటే ఇంకేం చేయగలరు.? రఘురామపై అనర్హత వేటు మాత్రమే వైసీపీ ఎంపీలకు ముఖ్యం. అంతే తప్ప, రాష్ట్ర ప్రయోజనాలు మాత్రం అస్సలు అనవసరం.

వ్యాక్సినేషన్ విషయమై నిన్న ప్రధాని నరేంద్ర మోడీ చేసిన ప్రకటన తర్వాత, ‘ఇదీ కేంద్రం మెడలు వంచడమంటే..’ అని ప్రచారం చేసుకున్నారు వైసీపీ మద్దతుదారులు. అంతకు ముందు వైఎస్ జగన్ లేఖ రాశారట.. ఆ లేఖ పట్ల ప్రధాని సానుకూలంగా స్పందించాట.. కాదు కాదు, దెబ్బకి దిగొచ్చారట. ఎలా.? ప్రైవేటుకి వ్యాక్సిన్ వద్దని జగన్ లేఖ రాస్తే, ప్రైవేటుకి 25 శాతం వ్యాక్సిన్లు కొనసాగుతాయ్.. అని మోడీ కుండబద్దలుగొట్టేశాక.. ఇంకా ఈ అడ్డగోలు భజన ఎందుకు.?

పోనీ, మోడీ మెడలు వంచేసిన జగన్.. అన్నమాటే నిజమని అనుకుందాం. ప్రత్యేక హోదా విషయంలో కూడా వంచేయొచ్చు కదా.? సెక్షన్ 124 ఎ విషయమై రఘురామ చేస్తున్న ప్రయత్నం చాలా చాలా గొప్పది. ఇందులో ఇంకో మాటకు తావు లేదు. ఈ విషయంలో రఘురామ సక్సెస్ అయితే, ఇదే బాటలో ప్రత్యేక హోదా కోసం కూడా పోరాటం చేయొచ్చన్న కనీస ఇంగితం రాష్ట్రానికి చెందిన మిగతా ఎంపీల్లో (వైసీపీ మాత్రమే కాదు, టీడీపీ కూడా) లేకపోవడం శోచనీయం.